Mabetex të ndërtojë stadiumin e Interit?

Gjiganti italian, Interi, ka filluar punën në kërkimin e kompanisë për ndërtimin e stadiumit të ri, ndërsa drejtuesit e klubit më të madh italian kanë zhvilluar negociata me kompaninë kosovare, Mabetex.

Presidenti i Interit, Massimo Moratti, është takuar me vëllezërit e Behxhet Pacollit, pronarit të Mabetex, me të cilët ka biseduar mbi projektimin e stadiumit të ri.

“Massimo Moratti ka qëndruar për vizitë në kompaninë tonë. Këtë e ka bërë për të parë funksionet e kompanisë, çfarë kompanie jemi, duke shprehur njëkohësisht interesimin që ne ta bëjmë projektimin e stadiumit, që ndoshta në të ardhmen ta shikojmë edhe mundësinë e ekzekutimit të punëve. Janë biseda preliminare, ende nuk ka asnjë projekt, ende nuk është shpallur tenderi”, ka thënë Selim Pacolli për OraInfo.

Agim Pacolli (majtë), Massimo Moratti (mes), Selim Pacolli (djathtë) dhe përfaqësues të tjerë u takuan për të biseduar rreth stadiumit, Foto: Telegrafi.

Për kompaninë Mabetex fitimi i tenderit për ndërtimin e stadiumit të Interit nuk është prej projekteve më të rëndësishme të kompanisë. Tenderi nuk është hapur ende, por Selim Pacolli është shumë optimist.

“Po pritet të hapet tenderi. Është logjistika e klubit të futbollit të Interit. Ata janë duke punuar në këtë drejtim. Mbi të gjitha është edhe ajo që Behgjet Pacolli është mik me presidentin e Interit, Massimo Moratti, dhe faktikisht mund të jetë edhe kjo njëra prej interesave dhe referencave që ta fitojmë këtë projekt”, përfundoi Pacolli.

Interi ka filluar të mendojë për ndërtimin e stadiumit të ri, që do të kushtojë 550 milionë euro dhe do të ketë 66 mijë ulëse. Nga jashtë stadiumi pritet të jetë sikurse Allianz Arena i Bayernit, kurse nga brenda sikurse Emirates i Arsenalit. /Telegrafi/