LAJMI I FUNDIT:

Topalli falënderon Arabinë Saudite

Topalli falënderon Arabinë Saudite

Shqipëria falënderon Arabinë Saudite për investimet e bëra në vend gjatë gjithë këtyre viteve të fundit. Kështu ka thënë kryetarja e Kuvendit shqiptar, Jozefina Topalli, gjatë një konference të përbashkët për shtyp me kryeparlamentarin e Arabisë Saudite, Abdullah bin Muhamed bin Ibrahim Al-Al Sheikh, i cili gjendet në Tiranë për një vizitë zyrtare.

Duke i cilësuar si mjaft pozitive marrëdhëniet mes dy vendeve, Topalli ka theksuar se Arabia i ka dhënë një ndihmë shumë të madhe Shqipërisë. Ajo po ashtu tha se vizita e kryeparlamentarit të Arabisë Saudite koincidon me vendimin historik që do të merret për liberalizimin e vizave për Shqipërinë, duke e cilësuar këtë si një fakt pozitiv.

Nga ana e tij, kryetari i parlamentit të Arabisë Saudite, Abdullah Bin Muhamed Bin Al Al Sheik, duke e cilësuar Shqipërinë si një vend mik të Arabisë Saudite vlerësoi marrëdhëniet e shkëlqyera mes dy vendeve duke theksuar se vizita e tij do të ketë edhe frytet e saj pozitive.

Delegacioni i Parlamentit të Arabisë Saudite në Shqipëri do të takohet edhe me kryeministrin Sali Berisha, presidentin Bamir Topi dhe ministrin e Punëve të Jashtme, Edmond Haxhinasto. /noa/start/telegrafi/