Miliardat nëntokësore

Sektori minerar në Kosovë ka hyrë nën llupën e kompanive të huaja, bash në kohën kur investimet janë në rënie. Vetëm për hulumtimin e mineraleve metalike, KPMM u ka lëshuar licenca 21 kompanive. E fundit u licencua “Avrupa mineral LTD”. Shfrytëzimi i të gjitha resurseve minerale, për 25 vjet, do t`i sillte Kosovës mbi 7.6 miliardë euro fitime.

Shfrytëzimi i të gjitha resurseve minerale në Kosovë, brenda një periudhe prej 25 vjetësh, parashihet të jetë mbi 7.6 miliardë euro dhe paralelisht mundëson krijimin e 20 mijë vendeve të punës. Me gjasë, ky potencial që ka nëntoka kosovare, shihet si shumë atraktiv për shumë kompani të huaja. Dhe kjo, bash në kohën kur investimet në sektorë të tjerë janë në rënie e sipër, shkruan Express.

Vetëm për hulumtimin e mineraleve metalike, Komisioni për miniera dhe minerale, u ka dhenë licenca 21 kompanive, në mesin e të cilave ka edhe të huaja. Së fundi, bëhet fjalë për kompaninë “Avrupa mineral LTD”, e cila është bërë aksionare kryesore e kompanisë “Innomatik Exploration Kosovo L.L.C”. Kësaj të fundit, KPMM-ja i ka lëshuar disa licenca për hulumtim të mineraleve.

Azem Rexhaj, drejtor i pavarur për miniera dhe minerale, thotë se këto licenca prej 21 sosh, janë lëshuar kryesisht për hulumtime në zbulimin e minierave të reja.

“Duhet të ju sqaroj se këto licenca janë të lëshuara në zonat që kryesisht nuk janë të hulumtuara më herët, dhe nëse hulumtimet rezultojnë me rezultate pozitive, atëherë mund të hapet ndonjë minierë”, tha Rexhaj.

Sipas tij, të gjitha këto hulumtime kryhen me kapital privat dhe nëse hulumtimi rezulton pozitiv, vjen deri te hapja e minierave të reja. /Telegrafi/