Banka Ekonomike korrekte në treg

Banka Ekonomike është duke vepruar me sukses në tregun bankar të Kosovës. Ajo kohëve të fundit sipas drejtuesve të saj ka shënuar rritje të depozitave edhe kredive. Po ashtu, portfolio kreditore aktive në këtë bankë thuhet se kapë shumën prej rreth 84 milionë euro.

Drejtori i Bankës Ekonomike, Valon Lluka tha për Telegrafin se depozitat në Bankën Ekonomike vazhdimisht kanë shënuar rritje, ndërsa deri në fund të shtator depozitat e klientëve kapin shumën prej rreth 104 milionë euro.

Sipas tij, sektorët më të kredituar nga kjo bankë janë ai i tregtisë, ndërtimtarisë, prodhimit, bujqësisë dhe sektor të tjerë të cilët kanë një rol të madh në zhvillimin e ekonomik të vendit.

Lluka, po ashtu ka treguar se banka ka lëshuar shumë produkte të reja duke filluar nga e-banking, debit dhe kredit kartelat ndërkombëtare Visa dhe Mastecard, ndërkaq po ashtu kanë filluar të ofrojnë pako të ndryshme për klientët.

“Si bankë vendore që jemi, kohët e fundit kemi dëshmuar që jemi shumë konkurrent në treg, gjë që tregon rritja e vazhdueshme e aseteve të bankës. Jemi shumë të lumtur që edhe qytetarët janë vetëdijesuar, ku shumë prej tyre hapin llogari çdo ditë dhe kanë besim për kursimet e tyre. Kjo dëshmohet edhe në ndryshimin pozitiv që e kemi pasur në strukturën e depozitave ku pjesën më të madhe e zënë depozitat e qytetarëve. Mbi të gjitha, vlen të theksohet që Banka Ekonomike ka rritur edhe pjesëmarrjen në tregun bankar të Kosovës”, tha ai.
Lluka ka treguar se kredit e këqija në Bankën Ekonomike qëndrojnë mjaft mirë. Kapitali i bankës, sipas drejtorit është 12 milionë euro. /Telegrafi/