AKP në konton e saj edhe mbi 2.3 milionë euro

Agjencia Kosovare e Privatizimit (AKP) ka hapur ofertat e shitjeve përmes metodës së shitjes me Likuidim nr. 4, ku shpalli ofertuesit e përkohshëm për 20 asete të Ndërmarrjeve Shoqërore.

Për këto aset AKP ka pranuar 48 oferta, me një vlerë të tërësishme e ofertave më të larta ishte 2 milionë e 374 mijë e 653 euro.

AKP deri më tani ka privatizuar 601 ndërmarrje të reja, prej të cilave 576 janë privatizuar përmes metodës së Spin Off-it të Rregullt, ndërsa 25 prej tyre janë privatizuar përmes metodës së Spin Off-it Special.

Nga privatizimi i ndërmarrjeve shoqërore deri më tani janë grumbulluar 458 milionë euro, ndërkaq nga procesi i likuidimit me shitje të aseteve të ndërmarrjeve janë grumbulluar 27 milionë euro.

Agjencia Kosovare e Privatizimit tani është duke punuar që të përfundoj të gjitha shitjet, në pritje të vendimit të Bordit të Drejtorëve të AKP-së.

Bazuar në strategjinë për përshpejtimin e ndarjes së 20 përqindëshit, Bordi i Drejtorëve i AKP-së gjatë tre muajve të fundit ka aprovuar shpërndarjen e 20 përqindëshit për 50 lista të punëtorëve të ndërmarrjeve.

Nga fondi i privatizimit, punëtorëve të Ndërmarrjeve Shoqërore u janë shpërndarë mbi 30 milionë euro. /Telegrafi/