Kjo Qeveri, përveç territ, po sjell edhe mjegull!

Ditëve të fundit kur Kosova është në një kolaps të plotë energjetik, është më se e domosdoshme që të rishikojmë zhvillimet energjetike në vend, ka deklaruar të dielën në një konferencë për media, Avni Arifi, anëtar i Kryesisë Qendrore të AAK-së.

Arifi, i cili njëherësh është edhe këshilltari Kryesor i Kryetarit të AAK-së, Ramush Haradinaj, tha se në vitin 2007, PDK-ja dhe lideri i saj Hashim Thaçi dhanë dy premtim, që sipas tij po vërtetohet se kanë qenë premtime boshe.

“Premtimi i parë: ‘Do të sigurojë 24 orë rrymë për tërë Kosovën’. Ndërkaq premtimi i dytë i kryeministrit aktual ishte: ‘Qeveria Thaçi kurrë nuk do të jap para për KEK-un, por KEK-u do ti jap para buxhetit të Kosovës’. Nga perspektiva e sotshme shohim se të dy këto premtimet kanë qenë mashtrime ordinere, vetëm e vetëm që qytetarët ne procesin zgjedhor të votojnë PDK”, tha Arifi.

“A ka siguruar Qeveria Thaçi 24 orë rrymë, këtë e shohin dhe e dinë shumë mirë të gjithë qytetarët e vendit posaçërisht ata që nuk jetojnë në lagje dhe qendra të caktuara qytetesh”.

Arifi tha se Qeveria Thaçi, jo që nuk e ka ndërprerë importin e rrymës me parat e buxhetit të shtetit, por e ka shumëfishuar këtë.

“Në vitin 2007 për import të rrymës Qeveria e Kosovës ka ndarë 15 milion euro;
Në vitin 2008 Qeveria Thaçi ka ndarë nga buxheti i shtetit rreth 60 milion euro;
Në vitin 2009 60 milion euro;
Në vitin 2010 janë dhënë 70 milion euro”, tha anëtari i Kryesisë së AAK-së.

Kur është në pyetje menaxhimi dhe transparenca, Arifi tha se lirisht mund të thuhet se kjo Qeveri përveç se është Qeveri e territ, është Qeveri edhe e mjegullës totale.

“Është mjegull e plotë qasja e Qeverisë në investime në kapacitete të reja që është dashur të ndodhin në vitin 2008… Është mjegull e plotë për opinionin se kush dhe si po përfiton nga importet tejet të shtrenjta që Kosovës po i kushtojnë me dhjetëra miliona në të njëjtën kohë kur varfëria dhe papunësia në Kosovë po e mbërrijnë kulminacionin”. /Telegrafi/