Rrezikohen 213 mln euro

Kosova detyrimisht duhet të hyjë në programe financiare me Fondin Monetar Ndërkombëtar, përndryshe rrezikon seriozisht t’i humbë 213 milionë euro donacione direkte për buxhet të premtuara nga Komisioni Evropian dhe Banka Botërore në konferencën e donatorëve dy vjet më parë. Po ashtu, të rrezikuara janë edhe mjetet e donatorëve të tjerë, që në total kapin shifrën 1.2 miliard euro.

Për t`i përfituar këto para, Qeveria e Kosovës duhet t’iu përmbahet rekomandimeve të Fondit për reforma në administratën publike dhe të përmirësoj politikat makroekonomike.
Megjithatë, ndërkombëtarët nuk janë të kënaqur me këto dy pika, edhe pse i kishin dhënë rekomandimet qysh nëntorin e vitit të kaluar në raportin e progresit. Kjo u dëshmua edhe në mbledhjen e Forumit të Nivelit të Lartë, ku drejtori operativ i Komisionit Evropian, Kjartan Bjornson, shumë direkt i rikujtoi Qeverisë së Kosovës së rrezikon t’i humb seriozisht donacionet e premtuara në Konferencën e donatorëve nëse nuk bënë marrëveshje me Fondin Monetar për reforma.

Programet financiare të institucioneve financiare, siç është FMN-ja, parashohin reagimin e një vendi ndaj politikave financiare konform disa rregullave ndërkombëtarë. Këto rregulla synojnë të sigurojnë qëndrueshmërinë buxhetore, pra parandalojnë zhytjen e vendeve në kriza të thella ekonomike apo në zhytje të deficiteve.