Kosova ka 1,046 shkolla fillore dhe të mesme, në 13,033 paralele me 280,823 nxënës

Agjencia e Statistikave të Kosovës (ASK) ka publikuar “Statistikat e Arsimit Fillor dhe të Mesëm të Ulët 2013/2014” .

Ky publikim ofron të dhëna për: arsimin fillor dhe të mesëm të ulët publik dhe privat 2013/2014; numrin e shkollave; numrin e paraleleve; numrin e nxënësve sipas gjinisë, moshës dhe përkatësisë etnike; si dhe numrin e mësimdhënësve sipas gjinisë, përkatësisë etnike, përgatitjes arsimore.

Sipas rezultateve të dala nga ky publikim, numri i shkollave fillore dhe të mesme të ulëta publike në vitin 2013/2014 ishte 1,046 me gjithsej 13,033 paralele dhe me numër të nxënësve 280,823.

Numri i nxënësve në arsimin fillor ishte 145,783, prej tyre 70,504 (ose 48,4 për qind) janë femra, ndërsa 75,279 (ose 51,6 për qind) meshkuj. Numri i mësimdhënësve ishte 7,870, ku prej tyre 4,681 (ose 59,4 për qind) femra, ndërsa 3,189 (ose 40,6 për qind) meshkuj.

Numri i nxënësve në arsimin e mesëm të ulët ishte 135,040, prej tyre 65,158 (ose 48,3 për qind) femra, ndërsa 69,882 (ose 51,7 për qind) meshkuj. Numri i mësimdhënësve ishte 9,981, prej tyre 4,217 (ose 42,2 për qind) femra, ndërsa 5,764 (ose 57,8 për qind) meshkuj.

Numri i përgjithshëm i nxënësve, të cilët kanë braktisur shkollën fillore dhe të mesme të ulët ishte 1,061, prej tyre 483 (ose 45,5 për qind) femra, ndërsa 578 (ose 54,5 për qind) meshkuj.

Numri i shkollave fillore dhe të mesme të ulëta private ishte 15, me gjithsej 127 paralele; dhe, me numër të nxënësve 2,095, prej tyre 964 nxënës ishin në arsimin fillor, ndërsa 1,131 në arsimin e mesëm të ulët. Numri i mësimdhënësve ishte 344. /Telegrafi/