Një debutues nga minuta e parë, formacioni i mundshëm i Kosovës për ndeshjen ndaj Islandës

Kombëtarja e Kosovës do të zhvilloj sonte (e enjte) ndeshjen e parë të vitit 2025.

Dardanët në ‘Fadil Vokrri’ përballen me Islandën në kuadër të ‘Play-Off’-it të Ligës së Kombeve, ku fituesi pas dy dueleve do të luaj në Ligën B.

Lajmi i mirë është sigurisht që kapiteni Amir Rrahmani është i gatshëm për këtë ndeshje, derisa lëndimin e ka kaluar edhe mesfushori me përvojë Valon Berisha.

Përzgjedhësi Franco Foda pritet t’i hedh në fushë 11 lojtarët më në formë, derisa në portë pritet të jetë i padiskutueshmi Aro Muric.

Mërgim Vojvoda do të jetë në krahun e djathtë të mbrojtjes, derisa në qendër janë tanimë tandemi fantastik Amir Rrahmani dhe Lumbardh Dellova. Për krahun e majtë ka balotazh mes Donat Rrudhanit dhe Leart Paqaradës, por ylli i Luzernit pritet të jetë startues për shkak edhe të ndeshjeve të fundit me fanellën Dardane.

Lexo po ashtu Dita e ndeshjes: Kosova pret Islandën në 'Fadil Vokrri', Dardanët duan fitore në ndeshjen e parë

Në mesfushë pritet të nisë nga minuta e parë ylli Elvis Rexhbecaj, derisa pranë tij në qendër të mesfushës pritet të debutojë ardhja e re Vesel Demaku.

Më i avancuar se dy mesfushorët defensivë do të luaj Valon Berisha.

Ndërkohë treshja e sulmit do të përbëhet nga Milot Rashica, Ermal Krasniqi dhe Vedat Muriqi.

Kosova dhe Islanda luajnë me fillim nga ora 20:45 në ‘Fadil Vokrri’. /Telegrafi/