Fillon rigjykimi për spitalin modular në Tetovë, të akuzuarit deklarohen të pafajshëm

Ka filluar seanca kryesore e rigjykimit për spitalin modular në Tetovë, e cila deri më tani është shtyrë katër herë. Drejtorët e atëhershëm Florin Besimi dhe Artan Etemi, të cilët akuzohen për veprën penale “krime të rënda kundër sigurisë publike”, u deklaruan të pafajshëm.

Gjithashtu përfaqësuesi i personit juridik ISHP Spitali Klinik për veprën penale “shkaktim i rrezikut të përgjithshëm” deklaroi se nuk ndihen përgjegjës. Pas deklarimit, gjyqtari i ri kryesor, Rexhep Musa, dha pauzë prej gjysmë ore.

Ndryshe, Gjykata e Apelit në Gostivar vendosi në prill të vitit 2024 për rigjykim të dy ish-drejtorëve dhe Spitalit Klinik si person juridik. Procesi ishte dashur të fillonte më 26 qershor 2024, por u shty për në 25 shtator 2024, më pas në 5 nëntor 2024 dhe në 15 janar 2025.

Më 5 qershor 2023, Gjykata Themelore e Tetovës shqiptoi dënim me kusht për drejtorët e akuzuar Florin Besimi dhe Artan Etemi për veprën penale “vepra të rënda kundër sigurisë publike”, ndërsa personi juridik ISHP Spitali Klinik është shpallur fajtor për veprën penale “shkaktim i rrezikut publik”, ndërsa gjykata vendosi të lirojë Boban Vuçevskin dhe Spitalin Klinik për veprën penale “mosrespektim i rregullave shëndetësore”.

Sipas aktgjykimit, të pandehurit Florin Besimi dhe Artan Etemi janë dënuar me një vit e gjashtë muaj burg, me kusht, ndërsa dënimi me burg nuk do të kryhet nëse të pandehurit nuk kryejnë vepër të re brenda tre viteve.

Për zjarrin në spitalin modular të Tetovës që ndodhi më 8 shtator 2021, ku humbën jetën 14 persona, më 27 korrik 2022, Prokuroria pas dhjetë muajsh të procedurës hetimore ka ngritur aktakuzë në Gjykatën Themelore të Tetovës./Telegrafi/