Fitorja e Barcelonës ndaj Benficas nuk kaloi pa pasoja, tre lojtarë do të pushohen

Ishte një paraqitje madhështore e Barcelonës që mposhti Benfican 1-0 në ndeshjen e parë të 1/8 të Ligës së Kampionëve, veçanërisht duke pasur parasysh që skuadra e Hansi Flick u detyrua të luante pas 10 minutash me 10 lojtarë pasi Pau Cubarsi mori të kuqin në fillim. 

Goli i pjesës së dytë i Raphinhas i siguroi Barcelonës me një avantazh prej një gol për ndeshjen e kthimit të së martës, megjithëse performanca në Lisbonë nuk erdhi pa sakrifica.  

Alejandro Balde pësoi një dëmtim në kyçin e këmbës gjatë ndeshjes, për të cilin do të duhet t’i nënshtrohet testeve mjekësore dhe tani Marca ka raportuar se dy lojtarë të tjerë e kanë përfunduar përballjen në “Estadio da Luz” me probleme fizike. 

Inigo Martinez pësoi një goditje në këmbë gjatë pjesës së parë – e cila kaloi pa u ndëshkuar, dhe për shkak të kësaj, mbrojtësi veteran mori karton të verdhë nga gjyqtari Felix Zëayer për ankesa.  

Ai ende po vuan nga pasojat e kësaj, dhe ai mund të pushohet kundër Osasuna të shtunën për të siguruar që ai të jetë 100 për qind për ndeshjen e dytë. 

Në raport thuhet se edhe Pedri ka vuajtur nga shqetësime muskulare dhe është një tjetër që nuk pritet të rrezikohet ndaj Osasunas.

Hansi Flick ka të ngjarë të bëjë ndryshime të rëndësishme për përballjen e La Ligës, me lojtarë si Marc Casado, Eric García, Gerard Martín, Gavi dhe Ferran Torres që do të përfshihen në formacionin fillestar për t’u përballur me Los Rojillos. /Telegrafi/