Thiago Motta “frikëson” Interin, pasi Juventusi po afrohet – por trajneri refuzon të flasë për Scudetto

Juventusi u afrua gjashtë pikë nga lideri Inter pas fitores së tyre të pestë radhazi në Serie A, duke mposhtur Veronën 2-0.

Thiago Motta, megjithatë, mbetet i përqendruar në performancën e skuadrës dhe jo në garën për titullin. 

Ndeshja në Allianz Juventus Stadium ishte e tensionuar, me tifozët duke protestuar për eliminimet e skuadrës nga Liga e Kampionëve dhe Kupa e Italisë.  

Goli i parë erdhi nga Khephren Thuram, ndërsa Teun Koopmeiners siguroi fitoren. 

Motta vlerësoi performancën e skuadrës, duke theksuar karakterin dhe urinë e lojtarëve, ndërsa lavdëroi gjithashtu edhe mesfushorin Teun Koopmeiners. 

“Më vjen mirë që djemtë dëshmuan edhe një herë se kanë karakter, uri, luajnë futboll të mirë dhe e dinë se çfarë do të thotë të luash në këtë nivel.” 

“Koopmeiners? Ai është një lojtar i rëndësishëm për ne, i cili mund të luajë role të ndryshme. Goli do të jetë i rëndësishëm për të, por gjithmonë e kam mbrojtur sepse e di se çfarë mund t’i japë skuadrës”, deklaroi Motta. 

Përpara ndeshjes së rëndësishme kundër Atalantës, Motta theksoi nevojën për energji dhe përqendrim.  

“Atalanta është një nga skuadrat më të mira në ligë. Do të jetë një ndeshje e vështirë, dhe ne duhet të jemi gati”, përfundoi Motta . 

Juventusi tani synon të ruajë momentumin e tij pozitiv ndërsa garon për një vend në krye të Serie A. /Telegrafi/