Haradinaj: Kurti po tenton manipulimin e rezultatit

Kryetari i Aleancës për Ardhmërinë e Kosovës (AAK), Ramush Haradinaj, ka akuzuar kryeministrin Albin Kurti për kapjen e institucioneve të pavarura, duke përfshirë Komisionin Qendror të Zgjedhjeve (KQZ).

Ai thekson se dështimi i sistemit të KQZ-së në zgjedhjet parlamentare ka rezultuar në mosshpalljen e rezultateve preliminare edhe pas 24 orësh, një situatë e paprecedentë në historinë e Kosovës së pavarur.

Sipas Haradinajt, kjo është pasojë e zëvendësimit të kuadrove profesionale me militantë partiakë dhe dhënies së tenderëve të dyshimtë për kompani të teknologjisë informative.

Haradinaj gjithashtu shpreh shqetësimin për një skemë të organizuar të manipulimit të rezultateve zgjedhore përmes kontrollit politik të KQZ-së dhe dështimit të qëllimshëm të sistemit teknik, duke synuar ndryshimin e vullnetit të qytetarëve. Ai e konsideron këtë si një goditje të rëndë ndaj demokracisë dhe vlerave për të cilat është luftuar.

Në përfundim, Haradinaj bën thirrje për mbrojtjen e votës së lirë dhe integritetit të procesit zgjedhor, duke paralajmëruar përdorimin e të gjitha mekanizmave institucionalë dhe ligjorë për të mbrojtur vullnetin e qytetarëve.

Ai i kërkon institucioneve të drejtësisë që të marrin masa urgjente për të hetuar manipulimet e pretenduara dhe për të parandaluar degradimin e mëtejshëm të procesit zgjedhor./Telegrafi/