“Kur vjen një lojtar si Kolo Muani, puna jonë bëhet më e lehtë” – Locatelli vlerëson lartë francezin

Mesfushori i Juventusit, Manuel Locatelli, ka ndarë pritshmëritë e tij përpara ndeshjes kundër PSV-së në Ligën e Kampionëve.  

Duke folur me gazetarë, Locatelli theksoi se ndeshja do të jetë shumë e rëndësishme dhe se Juventusi duhet të qaset me seriozitet. 

Zonja e Vjetër nuk arriti që të përfundojë në mesin e tetë ekipeve më të mira në fazën e ligës në Ligën e Kampionëve dhe duhet të luajë play-off.  

“E nesërmja do të jetë shumë e rëndësishme, pasi ne po luajmë në shtëpi kundër një kundërshtari të madh – një ekip i ri me të cilin jemi përballur tashmë, por nesër do të jetë ndryshe. Është ndeshja e parë, por është thelbësore që t’i qasemi mirë”, ka thënë Locatelli. 

Gjatë konferencës për shtyp, ai vlerësoi edhe ndikimin e sulmuesit të ri Randal Kolo Muani, i cili u bashkua Juventusit gjatë afatit të transferimeve.  

“Ai është një djalë shumë i mirë. Ne i dinim cilësitë e tij. Kur vjen një lojtar i tillë, puna jonë bëhet më e lehtë”,  deklaroi Locatelli.  

Kolo Muani ka arritur pesë gola me Juventusin vetëm në tri ndeshje, duke i ndihmuar bardhezinjtë të gjejnë stabilitet në kampionat në xhirot e fundit. /Telegrafi/