Izraeli nuk i lejon kalimet, mijëra palestinezë të bllokuar në Gaza

Donald Trump ka deklaruar se Jordania dhe Egjipti duhet të pranojnë palestinezët nga Gaza e shkatërruar nga lufta.

Presidenti amerikan u bëri thirrje të dy vendeve që të pranojnë njerëz përkohësisht ose përgjithmonë, duke shtuar: “Ne thjesht duhet ta pastrojmë të gjithën”.

“Është fjalë për fjalë një vend rrënimi, pothuajse gjithçka është shkatërruar dhe njerëzit po vdesin atje”, u tha ai gazetarëve pas një telefonate me Mbretin Abdullah të Jordanisë.

Ndërsa tani dhjetëra mijëra njerëz mbeten të bllokuar nga kthimi në veri të Gazës pasi Izraeli akuzoi Hamasin për shkeljen e marrëveshjes së armëpushimit dhe refuzoi të hapte postblloqe për të lejuar kalimet në veri.

Një ditë pas një shkëmbimi të dytë që përfshinte katër gra izraelite të mbajtura peng për 200 të burgosur palestinezë, dhjetëra palestinezë të bllokuar prisnin përgjatë rrugëve kryesore që të çojnë në veri, shkruan skynews, përcjell Telegrafi

Veturat e kamionët ishin të mbingarkuar me dyshekë, ushqim dhe tenda që shërbyen si strehë për më shumë se një vit për ata në zonat qendrore dhe jugore të enklavës.

“Një det njerëzish është duke pritur për një sinjal për t’u kthyer në qytetin e Gazës dhe në veri”, tha Tamer al Burai, një person i zhvendosur nga qyteti i Gazës.

“Kjo është marrëveshja që u nënshkrua, apo jo? Shumë nga ata njerëz nuk e kanë idenë nëse shtëpitë e tyre janë ende në këmbë. Por ata duan të shkojnë pavarësisht, duan të vendosin tendat pranë rrënojave të tyre, ata duan të ndihen në shtëpi”, shtoi ai.

Bëhet e ditur se marrëveshja e armëpushimit – e ndërmjetësuar nga SHBA-ja, Katari dhe Egjipti – lejon që mijëra palestinezë të zhvendosur të kthehen në komunitetet e tyre.

Megjithatë, jo shumë kohë pasi ushtarët femra izraelite u liruan të shtunën, kryeministri izraelit Benjamin Netanyahu tha se nuk do të lejojë që palestinezët të kthehen në Gazën veriore derisa pengu civil Arbel Yehud të lirohet.

Izraeli thuhet se kishte kërkuar që ajo të ishte në listën e pengjeve të liruar dje.

Megjithatë, ajo nuk u përfshi nga Hamasi.

Mendohet se ajo mund të mbahet nga Xhihadi Islamik Palestinez, një grup tjetër militant në Rripin e Gazës. /Telegrafi/