Man United ka gjetur lojtarin e duhur për të zgjidhur problemet me krahun e majtë të mbrojtjes

Manchester United raportohet se janë duke mbajtur një sy afër situatës së Miguel Gutierrez para hapjes së afatit kalimtar dimëror. 

‘Djajtë e Kuq’ pritet që të shpenzojnë një shumë të madhe parash për ta përforcuar skuadrën gjatë muajve në vazhdim, pasi trajneri i ri Ruben Amorim po synon rindërtimin e ekipit. 

Një prej pozitave kryesore që është përmendur si nevojë për ta përforcuar është ajo e krahut të majtë të mbrojtjes, kjo për shkak të problemeve të vazhdueshme të Luke Shaw me lëndimet. 

Sipas një raportimi nga Teamtalk.com, Gutierrez tashmë është bërë një opsion i mundshëm dhe ai ka një klauzolë lirimi prej 35 milionë eurosh me Gironan. 

Sidoqoftë, nuk është e sigurt se mund të hapen negociata për transferimin e tij, pasi ish-ekipi i Gutierrez, Real Madrid, po ashtu ka shprehur interesim për të. 

‘Los Blancos’ ende zotërojnë 50 për qind të klauzolës së Gutierrez dhe një klauzolë riblerje prej 8 milionë eurosh, si pjesë e marrëveshjes kur e shitën atë në 2022. 

Gutierrez me gjasë pritet që të kërkojë siguri sa i përket rolit të tij në skuadër, para se të konsiderojë ndonjë largim të mundshëm./Telegrafi/