“Alarm ajror”, Rumania ngriti dy aeroplanë për shkak të dronëve rusë të zbuluar pranë kufirit

Zona veriore e qarkut Tulcea ishte sërish nën alarm ajror, pasi grupe dronësh u zbuluan që po shkonin drejt hapësirës ajrore të Ukrainës, pranë hapësirës ajrore të Rumanisë, mbrëmjen e së dielës.

Kështu raportojnë mediat e huaja, sipas të cilave, si rezultat, dy aeroplanë F-16 janë ngritur nga toka, përcjell Telegrafi.

“Forcat e armatosura të Federatës Ruse kryen një seri të re sulmesh me dronë ndaj objektivave civile dhe infrastrukturore në Ukrainë, pranë kufirit lumor me Rumaninë. Si rezultat i zbulimit mbi Detin e Zi të grupeve të dronëve që drejtohen drejt hapësirës ajrore të Ukrainës, pranë hapësirës ajrore të Rumanisë, Qendra e Komandës Ushtarake Kombëtare njoftoi Inspektoratin e Përgjithshëm për Situatat e Emergjencave, në orën 23:34, në lidhje me vendosjen e alarmit ajror në zonën veriore të qarkut Tulcea. Për monitorimin e situatës në hapësirën ajrore, dy aeroplanë F-16 të Forcave Ajrore Rumune, në shërbim luftarak të Policisë Ajrore, u ngritën nga Baza Ajrore 86 Borcea”, është thënë në një njoftim të Ministrisë së Mbrojtjes.

Sipas këtij njoftimi, alarmi ajror përfundoi rreth orës 00:45 dhe aeroplanët F-16 u kthyen në aeroportin bazë.

Siç thuhet më tej, sistemi i mbikëqyrjes i radarëve të Rumanisë, i cili monitoronte në mënyrë të përhershme situatën e krijuar nga këto sulme, nuk zbuloi depërtimin e mjeteve ajrore të përfshira në sulmin ndaj objektivave të Ukrainës në hapësirën ajrore kombëtare.

Pavarësisht kësaj, duke nisur nga mëngjesi i së hënës, sipas procedurave të përcaktuara për këto situata, forcat e këtij vendi do të kryejnë hetime në zonat e territorit kombëtar që ndodhen pranë objektivave të sulmuara nga forcat ruse.

“MoND informoi dhe vazhdon të informojë në kohë reale strukturat aleate për situatat e krijuara nga sulmet, duke mbajtur kontakte të përhershme me to”, thuhet më tej në njoftim.

“Ministria e Mbrojtjes Kombëtare rithekson mesazhin e fortë të dënimit të këtyre sulmeve të kryera nga Federata Ruse ndaj objekteve dhe elementeve të caktuara të infrastrukturës civile të Ukrainës, të cilat janë të pajustifikuara dhe në kundërshtim serioz me normat e së drejtës ndërkombëtare”, përfundon njoftimi. /Telegrafi/