Olimpiada Matematike Evropiane për vajza, për herë të parë organizohet në Kosovë

Në mbledhjen e djeshme të Qeverisë, (në Ditën Ndërkombëtare të Vajzave) Qeveria ka marrë vendim edhe për ndarjen e 200 mijë eurove për organizimin e Olimpiadës Matematike për vajza (EGMO 2025).

E për këtë çështje, ministrja e Arsimit, Arbërie Nagavci ka thënë se kjo olimpiadë organizohet nga Shoqata e Matematikanëve të Kosovës, dhe sipas saj ky do të jetë organizim prestigjioz ndërkombëtar që do të mbahet nga data 11 deri në 17 prill 2025 në Prishtinë.

Sipas Nagavcit, gara zhvillohet çdo vit në një vend të ndryshëm të Evropës me pjesëmarrje të rreth 60 shteteve, duke i përfshirë edhe shtetet jo-evropiane që marrin pjesë si mysafirë.

“Që nga marrja e mandatit si Qeveri, kemi ofruar mbështetje shumëdimensionale për matematikanët e rinj, mes të tjerash përmes subvencioneve të përvitshme për Shoqatën e Matematikanëve të Kosovës, dhe mbështetje për pjesëmarrjen e tyre në gara ndërkombëtare. Kosova do të ketë jo vetëm një organizim historik, por edhe përfaqësim dinjitoz të vajzave tona. Sot dhe çdo ditë për vajzat tona, sot dhe çdo ditë për të rinjtë, për vendin tonë!”, ka shkruar Nagavci në Facebook.