Sërish zjarr në objektin e Institutit të Mjekësisë Ligjore

Një incident i zjarri ka ndodhur në orët e para të së dielës në Institutin e Mjekësisë Ligjore.

Instituti i Mjekësisë Ligjore (IML) ka bërë një reagim pas incidentit, duke njoftuar se zjarri është shuar nga zjarrfikësit, transmeton Telegrafi.

“Sot më 30.06.2024 rreth orës 02:00 të mëngjesit, në njërën nga korridoret e daljes emergjente është lokalizuar zjarri nga stafi kujdestar në IML dhe i njëjti është shuar nga zjarrfikesit. Në vendin e ngjarjes kanë dal njësitet policore dhe ekspertët e zjarrit dhe elektroteknikës. Sipas vlerësimeve preliminare shkaku i zjarrit ka qenë defekti elektrik në njërën nga pajisjet elektrike në korridor, mirëpo mendimi përfundimtar do të jepet pas ekspertizës finale e cila do t’i dorëzohet Prokurorisë. Dëmi material është i vogël”, theksohet në njoftim.

Tutje, IML njofton se objekti do të renovohet, dhe se renovimi përfshin edhe instalimin e sistemit kundër zjarrit.

“Me këtë rast, njoftojmë opinionin publik se IML pritet t’i nënshtrohet procesit të renovimit i cili projekt ka kosto rreth 900,000 euro dhe do të fillojë sapo të përfundojnë procedurat e prokurimit, të cilat gjenden në fazën e ofertimit të operatorëve ekonomik e që parashihet të përmbyllet me 2 korrik. Renovimi do të përfshijë instalimin e sistemit kundër zjarrit, zëvendësimin dhe riparimin e instalimit elektrik, ventilimin dhe klimatizimin e ri, si dhe ridizajnimin e hapësirave të punës”, bëhet e ditur në njoftim.

Ndryshe, ky nuk është incidenti i vetëm me zjarr që ka ndodhur në këtë objekt.

Para disa muajsh, objekti i IML-së, ishte përfshirë nga zjarri ku u shkaktuan dëme materiale.

Lexo po ashtu Prokuroria deklarohet rreth zjarrit në IML: Kemi lëshuar disa autorizime për kryerjen e ekzaminimeve nga vendi i ngjarjes

Pas kësaj, Qeveria e Kosovës kishte ndarë 520 mijë euro për renovimin e objektit të Institutit të Mjekësisë Ligjore.

Instituti i Mjekësisë Ligjore është përgjegjës për menaxhimin dhe mirëmbajtjen e sistemit mjekoligjor në vend, për të siguruar shërbime mjekoligjore, mësimdhënie dhe shërbime përkrahëse për familjet e personave të zhdukur.

Detyrat e tij përfshijnë, po ashtu, sigurimin e ekspertizës mjekoligjore për organet publike, udhëheqjen e hetimeve mjekësore për vdekjen në vendin e ngjarjes, kryerjen e zhvarrosjeve, kryerjen e inspektimeve pas vdekjes dhe kryerjen e autopsive. /Telegrafi/