Kongresmenja amerikane: Të gjithë ata që votojnë për ndihmën për Ukrainën duhet të regjistrohen në ushtrinë ukrainase

Anëtarja republikane e Dhomës së Përfaqësuesve të Kongresit amerikan, Marjorie Taylor Greene, e njohur për lidhjet e forta me ish-presidentin amerikan, Donald Trump, propozoi një sërë ndryshimesh “ekstravagante” në ligjin që mbështet Ukrainën.

Greene propozoi ndryshimet në projekt-ligjin e financimit të Ukrainës përpara se të shqyrtohet nga Dhoma e Përfaqësuesve. Nuk ka gjasa që ndryshimet të fitojnë mbështetjen e kolegëve të Greene, sepse ato janë shumë flagrante.

Një amendament kërkon që çdo anëtar i Dhomës së Përfaqësuesve që voton në favor të projektligjit të ndihmës për Ukrainën, të regjistrohet në Forcat e Armatosura të Ukrainës.

Lexo po ashtu Zelensky viziton vijën e parë të frontit në Donetsk

“Dua të them, nëse doni të financoni një luftë, pse të mos luftoni në të”, tha ajo.

Ndryshime të tjera kërkojnë një raport që vërteton se kishat e krishtera në Ukrainë mund të funksionojnë pa ndërhyrjen e qeverisë dhe se asnjë fond nuk mund të përdoret ose shpenzohet derisa “qeveria e Ukrainës të mbajë zgjedhje të lira dhe të ndershme”.

Ambasadorja e Ukrainës në SHBA, Oksana Markarova, ka zbuluar detajet e projektligjit për mbështetjen e SHBA-së për Ukrainën, i cili pritet të shqyrtohet në Dhomën e Përfaqësuesve të Kongresit amerikan më 20 prill, pas disa muajsh vonesë.

Ambasadori njoftoi gjithashtu se Kongresi amerikan dëshiron të autorizojë konfiskimin e aseteve ruse dhe të detyrojë presidentin amerikan, Joe Biden të zgjerojë sanksionet. /Telegrafi/