Ndërron jetë ish kryetari i Rahovecit, Qasim Qeska

Ka ndërruar jetë Qasim Qeska, ish kryetari i Komunës së Rahovecit.

Lajmin e ka bërë të ditur kryetari i Rahovecit, Smajl Latifi, i cili ka ngushëlluar familjen Qeska, transmeton Telegrafi.

“I tronditur dhe me pikëllim të thellë, mësova për ndarjen nga jeta të njeriut të mirë, qytetarit të angazhuar, shembullit të urtësisë e mirësisë, ish-Kryetarit të Komunës së Rahovecit e aktivistit politik, Qazim Qeska”, thotë ai.

Tutje, Latifi ka theksuar se Qeska dha kontribut të çmuar për disa dekada në proceset, politike, ekonomike dhe shoqërore në Rahovec.

“Ishte ndër juristët më të mirë në komunën e Rahovecit dhe me përvojën e dijet juridike, ndikoi pozitivisht në konsolidimin e sistemit juridik. Si kryetar i Komunës së Rahovecit dha kontributin e tij në paqësimin ndërmjet grupeve politike, duke i kontribuuar konsolidimit të demokracisë vendore. Me urtësinë e durimin që e karakterizonte, u bë shëmbëlltyrë për gjeneratat e reja”.

“Rahoveci humbi sot një qytetar respekt plotë, kurse familja më të dashurin familjar, që rriti e edukoi fëmijë të respektuar në komunitet. Në këtë moment dhimbjeje e pikëllimi, në emër të qytetarëve të komunës së Rahovecit dhe në emër timin, familjes Qeska, farefisit, miqve dhe bashkëpunëtorëve të tij, u shpreh ngushëllime të thella dhe më të sinqerta”.

Tutje, Latifi ka pohuar “do të kujtohet me respekt si njeri me virtyte morale e vlera të larta njerëzore. U kujtoftë ndër breza vepra dhe jeta e qytetarit të respektuar, ish-kryetarit të Komunës së Rahovecit, Qazim Qeska”. /Telegrafi/