Irani ekzekuton katër persona të dënuar për “planifikim të sabotimit dhe lidhje të dyshuara me agjencinë izraelite të spiunazhit Mossad”

Irani thuhet se ekzekutoi të hënën katër burra të dënuar për planifikim të sabotimit dhe lidhje të dyshuara me shërbimin sekret izraelit Mossad, njoftoi media shtetërore.

Sipas mediave të huaja, përcjell Telegrafi, agjencia zyrtare e lajmeve IRNA tha se burrat u dënuan për planifikimin e synimit të një fabrike në vitin 2022 që i përkiste ministrisë së mbrojtjes të Iranit.

Operacioni dyshohet se ishte projektuar nga Mossad dhe të katër ishin trajnuar nga agjencia izraelite në një vend afrikan përpara se të hynin në Iran.

Të katër u identifikuan si shtetas iranianë: Mohammad Faramarzi, Mohsen Mazloum, Vafa Azarbar dhe Pejman Fatehi.

Ekzekutimi u krye pasi Gjykata e Lartë e vendit la në fuqi dënimet e tyre me vdekje, të dhëna nga një gjykatë tjetër në shtator.

Raporti nuk thoshte se si u kryen dënimet me vdekje, por në Iran zakonisht bëhet me varje.

Në vitin 2022, Irani tha se agjentët e tij të inteligjencës kishin “çmontuar” një grup të lidhur me Mossad-in që dyshohet se kishte planifikuar operacione terroriste brenda Iranit, duke arrestuar të gjithë anëtarët e grupit dhe duke konfiskuar një sasi të madhe armësh dhe eksplozivi.

Irani herë pas here raporton për arrestime, gjyqe dhe ekzekutime të shtetasve të tij për spiunazh për Mossad-in dhe shërbimet e tjera të inteligjencës perëndimore. /Telegrafi/