Tahiri: Qeveria Kurti ka rritur varësinë energjetike dhe ka ngritur çmimet në qiell

Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka kritikuar Qeverinë Kurti për menaxhimin e sektorit të energjisë dhe ekonomisë.

Tahiri ka thënë se ky ekzekutiv e ka rritur varësinë energjetike dhe ka ngritur në qiell çmimet si dhe krizën sociale e ekonomike.

Lexo po ashtu Në mungesë kuorumi, përfundon seanca e Kuvendit ku u diskutua për çmimin e rrymës

“Kur ishin në opozitë, dolën kundër çdo investimi ndërkombëtar energjetik. Asokohe doli kundër projekteve të linjitit ashtu edhe kundër projektit energjetik amerikan me gaz. Qëllimi i tij nuk ishte mirëqenia por lufta për pushtet”.

“Me vendimmarrje monopoliste për shtrenjtim të energjisë verës, ku piku dhe blloktarifat nuk marrin shumë vëmendje për shkak të konsumit të ultë, kjo qeveri ua tkurri qytetarëve standardin dhe shërbimet, i varfëroi”, ka shkruar ai në Facebook.

Shefi i deputetëve të AAK-së më tej është shprehur se kryeministri Albin Kurti “nuk e ka problem që me përhapjen e krizës sociale, të jetë në krye të qeverisë e cila po e zbrazë Kosovën”.

“Kalkulimet e tij dhe njerëzve përreth janë të thjeshta por fatkeqe për ne. Duke e zbrazur Kosovën, ky ‘fenomen’ politik, shpenzon më pak rrymë, pranon remitenca më shumë, për çmimet me të cilat pasurohet klika e tij. Krejt çfarë ka mbetur është të dërgoj Martin Berishajn në ndonjë vend ku ka më shumë diasporë, dhe ku nëse votohet në Ambasada, t’i mbushin kutitë!”.

“Kjo sot në seancën e jashtëzakonshme duhet të demaskohet, le të del në pah mashtrimi!”, ka përfunduar Tahiri. /Telegrafi/