Pse nuk u mbajt takimi Osmani-Haradinaj, çfarë thanë nga Presidenca e çfarë nga AAK? Pse për PDK-në takimet për Asociacionin nuk kanë efekt?

Të martën nuk u mbajtën takimet e presidentes Vjosa Osmani me partitë opozitare, gjegjësisht me Partinë Demokratike të Kosovës dhe Aleancën për Ardhmërinë e Kosovës.

Derisa nga PDK theksuan me fillim se nuk do të shkojnë në takim me Osmanin, një takim ndërmjet AAK dhe presidentes ishte thënë se do të mbahet.

Por, edhe ky takim ku pritej të diskutohej për zhvillimet në vend dhe draft-statutin e Asociacionit të komunave me shumicë serbe dështoi.

E pas kësaj, nga Aleanca për Ardhmërinë e Kosovës i thanë Telegrafit se takimi nuk është mbajtur pasi e para e shtetit nuk e ka respektuar orarin e përcaktuar.

Zëdhënësi i AAK-së, Kushtrim Xhemaili, tha se AAK kishte vullnet të mirë për të biseduar me presidenten Osmani për çështjet me rëndësi për vendin, veçanërisht për draft-statutin e Asociacionit”.

Ai tha se Haradinaj u detyrua të largohet nga presidenca pasi presidentja nuk arriti të respektojë orarin e caktuar.

Lexo po ashtu Haradinaj për draftin e Asociacionit: Shqetësohemi se ka ndërhyrje në rendin kushtetues

“Kryetari i AAK-së, Ramush Haradinaj si dhe sekretari i Përgjithshëm Muharrem Nitaj ishin në presidencë në orarin e përcaktuar nga Osmani, por fatkeqësisht presidentja nuk respektoi orarin e caktuar nga vetë ajo dhe për këtë arsye takimi nuk është realizuar”, tha Xhemaili.

Ndërkaq, për mosmbajtjen e takimit kanë njoftuar edhe nga Presidenca.

Këshilltari për media i Presidentes Vjosa Osmani, Bekim Kupina ka sqaruar pse Presidentja nuk ka zhvilluar takimin e paraparë me liderin e AAK-së, Ramush Haradinajn, për të diskutuar zhvillimet aktuale në vend dhe draftin e Statusit të Asociaicionit.

Kupina ka thënë për Telegrafin se takimi i Presidentes Osmani me kryetarin e AAK-së nuk është zhvilluar për shkaqe protokollare.

“Takimi ishte paraparë të mbahet, por për shkaqe protokollare nuk është realizuar. Z.Haradinaj nuk ka dashur të presë derisa protokolli e ka njoftuar Presidenten për arritjen e tij”, ka thënë Kupina.

Më tej ai ka thënë se “pavarësisht kësaj, Presidentja Osmani ka lënë të hapur mundësinë e takimit ditëve në vazhdim, kurdo që kreu i AAK-së e vlerëson se duhet diskutuar dhe adresuar çështjet e rëndësisë nacionale”.

“Dera e Presidencës vazhdon të mbetet e hapur”, tha ai.

Ndryshe, Zëdhënësi i AAK-së, Kushtrim Xhemaili, ka thënë po ashtu se takimi i planifikuar për të hënën nuk u mbajt për shkak të zgjatjes së një takimi të mëparshëm të presidentes Osmani me kryetarin e LDK-së, Lumir Abdixhiku.

Lexo po ashtu Kryesia e LDK-së del me shtatë konkluzione për draft-statutin e Asociacionit

Ndërkaq, nga Partia Demokratike e Kosovës kanë treguar me fillim se nuk do të jenë pjesë e takimeve.

Kryetari i Partisë Demokratike të Kosovës, Memli Krasniqi ka thënë sot se nuk ka marrë pjesë në takimin konsultativ të ftuar nga presidentja Vjosa Osmani, sepse konsideron se takimet e tilla nuk japin asnjë efekt real për çështjen e draft-statutit të Asociacionit.

Gjatë qëndrimit në Ferizaj, Krasniqi ka thënë se është e rëndësishme që për Asociacionin e komunave me shumicë serbe të jap qëndrim zyrtar kryeministri i Kosovës, i cili sipas tij, sot e kësaj dite ende nuk ka qëndrim.

Krasniqi tha se qëndrimi dhe rezervat e PDK-së sa i përket kësaj teme, prej preambulës deri tek nenet e fundit të draftit të prezantuar, janë të qarta dhe konkrete.

Lexo po ashtu Kryetari i PDK-së refuzon takimin me Osmanin për të diskutuar për draft - statutin e Asociacionit

“Me gjithë respektin për presidenten dhe pozicionin që ajo ushtron, nuk kam marrë pjesë në takimin e ftuar dje për arsye se ky ka qenë vetëm një takim konsultativ i cili nuk jep asnjë efekt real në çështjet për të cilat është menduar se duhet të diskutohet. Padyshim që ju takon liderëve institucional që të marrin përgjegjësitë të cilat ju takojnë, por ju takon pak më shumë që vërtetë të krijojnë situata ku edhe imputet tona do të kenë një efekt. Nuk besoj që na takon neve si liderë politikë që të lëshohemi në rolin e analistëve dhe të diskutojmë se çka është mirë dhe çka është keq, pa pasur mundësi që ta afektojmë në çfarëdo formë një rezultat ndërlidhur me çështjen e draft-statutit të Asociacionit”.

“Ne, sot e kësaj dite, ende nuk e dimë qëndrimin e Kryeministrit të Kosovës për sa i përket statutit të asociacionit. Andaj, ai është i pari që e ka edhe përgjegjësinë kushtetuese, institucionale, ligjore që të tregoj qëndrimin e tij të vërtetë e të mos krijojë herë vet, e herë përmes zëvendëskryeministrit apo të tjerëve duke thënë se kemi pranuar se kemi pranuar. Është e rëndësishme që ai i cili ka e përgjegjësinë për të marrë veprime ta qartësoj pozicionin e tij, sepse pozicioni ynë si PDK është i qartë”, theksoi ai. /Telegrafi/