Pse pyetja ‘Si kalove sot në shkollë?’ nuk është e duhura për fëmijët? Ja ç’duhet të thoni

“Si kalove sot në shkollë?” dhe “Si ishte dita jote?” nuk janë pyetjet më të mira për t’u bërë fëmijëve, sipas psikologëve.

“Si ishte dita jote?” mund të nënkuptojë 100 gjëra”, tha Dr. Linda Papadopoulos, një psikologe.

Çfarë të thuash në vend të kësaj pyetjeje të zakonshme?

“Jini të durueshëm dhe prisni derisa fëmija juaj të jetë gati të flasë,” u shpreh psikologia Deiros Collado.

“Përqendrohuni në atë moment se si ndihet kur e shihni përsëri fëmijën në fund të ditës tuaj, për shembull duke thënë: “Jam shumë i/e lumtur që të shoh!” Kuptoheni nëse fëmija po del nga shkolla i/e ngarkuar me emocione apo duket i/e tërhequr,” shtoi ajo.

Mundohuni t’i “emërtoni” emocionet e tyre kur i merrni nga shkolla. Për shembull, mund të thoni: “Dukesh shumë e lumtur! Diçka e bukur duhet të të ketë ndodhur sot”.

Provat neuroshkencore tregojnë se emërtimi i një emocioni mund të ndihmojë në qetësimin e trupit. Vetëm kur fëmijët janë të qetë dhe nevojat themelore të plotësohen, ata mund të zhvillojnë një bisedë kuptimplotë.

Zgjidhni kohën e përshtatshme për të folur me fëmijën dhe ja mënyra se si mund t’i bëni pyetjet:

▪ “Çfarë të bëri të qeshësh sot?”
▪ “Cila ishte gjëja e preferuar që të ndodhi sot?”
▪ “Çfarë të ka pëlqyer më shumë sot gjatë pushimit apo kohës së drekës?”
▪ “Çfarë tha mësuesja sot?”

Është gjithashtu e rëndësishme të flisni për emocionet, pasi ato mund t’ju tregojnë një anë tjetër të ditës së fëmijës suaj. Për shembull, mund të pyesni:

▪ “Je ndjerë i/e trishtuar sot? Çfarë ndodhi që të bëri të ndihesh më mirë?”
▪ “Çfarë ishte një gjë e vështirë që të ndodhi sot dhe si e zgjidhe?”
▪ “Ka pasur ndonjë moment që je ndjerë i/e vetmuar? Si e kalove?”

/Telegrafi/