Sulmi terrorist në Banjskë, Osmani: Do të ishte dëm i madh për paqen në rajon nëse BE-ja nuk vendos masa ndaj Serbisë

Presidentja e Kosovës, Vjosa Osmani ka thënë se do të ishte dëm i madh për paqen dhe stabilitetin në rajon si dhe për vetë procesin e dialogut, në rast se Bashkimi Evropian nuk vendos masa ndaj Serbisë.

E pyetur nga Telegrafi rreth deklaratave të zyrtarëve të BE-së sa i përket vendosjes së masave ose sanksioneve ndaj Serbisë, presidentja shtoi se duhet të bëjmë dallimin mes masave dhe sanksioneve që ndërmerren nga BE-ja.

“Duhet ta bëjmë dallimin e qartë mes sanksioneve dhe masave. Sa i përket sanksioneve ne e kemi ditur që nga fillimi që së paku njëra nga shtetet anëtare mund ta përdor veton në Këshill atje ku merren vendimet për sanksione, megjithatë ekziston mundësia e vendosjes së masave ndaj Serbisë e cila nuk kërkon vendim në nivel të Këshilli”, tha Osmani.

Ajo shtoi se kjo metodë është shfrytëzuar disa herë për masa kundër Rusisë, e për fat të keq është shfrytëzuar si metodë edhe kur janë ndërmarrë masat ndaj Kosovës.

Lexo po ashtu Osmani: Procesi i dialogut duhet të rimendohet, pas aktit të agresionit të Serbisë ndaj Kosovës

“Pra komisioni i BE-së, ka të drejtë dhe ka në kompetencë të propozoj masa të natyrës politike dhe financiare pa shkuar kjo çështje në nivel të këshillit dhe të shndërrohet në sanksione”, u shpreh Osmani.

Presidentja theksoi se BE-ja ka para vetes një sërë argumentesh që të ndërmerr vendim për vendosjen e masave ndaj Serbisë.

“Një numër i shteteve anëtare kanë dhënë sinjale pozitive që janë duke shqyrtuar një gjë të tillë, disa janë më insistuese në këtë punë se të tjerat, por është më rëndësi që Komisioni Evropian të dalë me propozim konkret rreth këtyre masave dhe me gjithë këto argumente që ata i kanë para tyre do të ishte dëm i madh për paqen dhe stabilitetin në rajon dhe për procesin e dialogut nëse nuk ndërmerret asnjë masë në raport me Serbinë”, u shpreh Osmani.

Ajo këto komente i bëri në një konferencë për media, të martën në Prishtinë, ku njoftoi se ka marrë vendim për mosdekretimin e Kryeprokurorit të Shtetit. /Telegrafi/