Arrestimi i të dyshuarve për dhunën në veri, deklarata e Borrellit dhe kundërpërgjigja e Kurtit

Policia e Kosovës po vazhdon me arrestimin e personave të dyshuar për dhunë dhe sulm në veri të vendit ndaj pjesëtarëve të KFOR-it më 29 maj si dhe personave të dyshuar për dhunë në ditët tjera të protestave.

Së fundi, saktësisht të premten Policia arrestoi të dyshuarin Nenad Orloviq, i njohur me nofkat “Nemac” dhe “Rusi”, si i dyshuar për përfshirje në dhunën ndaj ushtarëve të KFOR-it, pikërisht më 29 maj.

Në njoftimin për media bëhet e ditur se arrestimi i tij dhe shoqërimi në stacion policor është kryer pas sigurimit të dëshmive, se i njëjti është përfshirë në sulm ndaj KFOR-it, ku si pasojë e sulmeve dhe dhunës së shfaqur dhjetëra pjesëtarë të KFOR-it kanë pësuar lëndime trupore.

Lexo po ashtu Momenti i arrestimit i Nenad Orloviqit, i njohur si “Rusi” - i dyshuar për sulm ndaj KFOR-it

“Policia e Kosovës ka bërë të ditur se ka arrestuar një të dyshuar, N.O, i njohur me nofkat  Si rezultat i punës dhe hetimeve intensive të realizuara nga Policia e Kosovës, sot në orët e paradites është arrestuar i dyshuari mashkull serb N. O., me vendbanim në Mitrovicë Veri, i njohur me nofkat ‘Nemac’ dhe ‘Rusi’, si i dyshuar për përfshirje në rast të sulmit dhe rrezikimit të personave nën mbrojtje ndërkombëtare – KFOR-it”, thuhet në njoftim.

Arrestimi i tij dhe shoqërimi në stacion policor është kryer pas sigurimit të dëshmive, se i njëjti është përfshirë në sulm ndaj KFOR-it më datën 29 maj 2023, ku si pasojë e sulmeve dhe dhunës së shfaqur dhjetëra pjesëtarë të KFOR-it kanë pësuar lëndime trupore.

Më tej thuhet se të gjitha veprimet e mëtejme do të ndërmerren në bashkëpunim dhe koordinim me organet e drejtësisë.

Policia e Kosovës, do të vazhdojë angazhimin dhe përkushtimin e saj për ruajtje të rendit dhe sigurisë publike, për sundim të ligjit dhe sjelljen para organeve të drejtësisë së personave të dyshuar që bien në kundërshtim me rendin dhe ligjin.

E pas arrestimit të të dyshuarit për sulm ndaj KFOR-it ka reaguar shefi i Politikës së Jashtme të Bashkimit Evropian, Josep Borrell, i cili është shprehur të premten i alarmuar nga situata në veri të Kosovës.

Ai ka thënë se po bëhen arrestime të jashtëligjshme të serbëve në Kosovë.

Lexo po ashtu Borrell i alarmuar nga arrestimi i serbëve në veri dhe marshimi i FSK-së: Nuk do ta tolerojmë

“Shumë i alarmuar nga situata në veri të Kosovës: arrestime të jashtëligjshme të serbëve të Kosovës…”, ka shkruar Borrell në Twitter.

Ai ka theksuar se nuk do ta tolerojnë këtë.

“Pavarësisht takimeve të djeshme të krizës, përshkallëzimi vazhdon dhe po bëhet i rrezikshëm. Nuk do ta tolerojmë.”

E ndaj reagimi të ashpër të Borrellit, ashpër i është kundërpërgjigjur edhe kryeministri i vendit, Albin Kurti.

Kurti në reagimin e tij ka thënë se përhapja e panikut dhe pretendimeve të rreme veç “ndezin tensionet dhe u ndihmojnë atyre që kërkojnë përshkallëzim”.

“Një thirrje për të gjithë: Ju lutem konfirmojini burimet dhe prisni për informata zyrtare nga institucionet e Kosovës para se të vendosni të angazhoheni publikisht në transmetimin e lajmeve apo parashikimin e ngjarjeve”, ka shkruar kreu i ekzekutivit kosovar në Twitter.

Lexo po ashtu Kurti i reagon Borrellit: Dezinformimi, i rrezikshëm dhe i papranueshëm

Ai ka thënë se qytetari serb i arrestuar në veri gjatë ditës është kapur “bazuar në provat e shumta dhe në përputhje me Kodin e Procedurës Penale të Kosovës”.

Kurti ka thënë se si kryeministër i një shteti demokratik nuk është përfshirë në hetime e arrestime.

Deklaratës së Borrellit, i ka reaguar edhe ministrja e Jashtme, Donika Gërvalla, duke pyetur se deklarata e tij a është thirrje e BE-së për mosndëshkim për ata që sulmuan ushtarët e NATO-s.

“A po bën thirrje BE-ja për mosndëshkim për ata që sulmuan NATO-n?

Policia ka prova të qarta se personi i arrestuar ka marrë pjesë në sulmin kundër NATO-s më 29 maj.

Arrestimi u bë në bazë të nenit 71 të Kodit të Procedurës Penale të Kosovës, kështu që nuk ka asgjë jashtëgjyqësore”, ka shkruar Gërvalla.

Is the EU calling for impunity for those who attacked NATO?

The police has clear evidence that the person arrested today participated in attack against NATO on 29 May.

The arrest took place based on Art.71 of Kosovo’s Criminal Procedure Code so there’s nothing extra-judicial. https://t.co/LSqvIHrvf0

— Donika Gërvalla-Schwarz (@gervallaschwarz) June 23, 2023

I ashpër në reagim ndaj Borrellit ishte edhe drejtori ekzekutiv i Grupit Ballkanik për hulumtimin e politikave, Naim Rashiti.

Ai në një postim në Twitter shkruan se askush më shumë se Borrell nuk i nxit tensionet mes Kosovës dhe Serbisë.

“Askush më shumë se Josep Borrell nuk i nxit tensionet mes Kosovës dhe Serbisë. Çdo gjë që ai bën dhe thotë më tej çon drejt një konflikti. Shumë zyrtarë me bazë në Bruksel nuk mund të thonë publikisht zhgënjimin e tyre të thellë me të dhe ekipin e tij”, shkruan ai. /Telegrafi/

No one more than @JosepBorrellF fuels the tensions between Kosovo and Serbia. Everything he does and says further leads toward a conflict. Many Brussels-based officials can’t say publicly their deep disappointment and frustration with him and his team.

— Naim Rashiti (@naimrashiti) June 23, 2023