Mediat në Spanjë zbulojnë planin e Barcelonës për ta rikthyer Messin në Camp Nou

Thashethemet rreth rikthimit të Lionel Messit në Barcelonë po intensifikohen javët e fundit, saqë edhe vetë Joan Laporta, presidenti i klubit dhe njeriu që ‘e la të shkojë’ te PSG, ka kontaktuar yllin argjentinas duke siguruar se “ai e di që dyert e klubit janë të hapura për të”.

Megjithatë, këtë të shtunë Javier Tebas e bëri të qartë gjatë fjalimit të tij në “Marca Sport Weekend 2023” se me situatën ekonomike që po kalon aktualisht klubi katalunas, ​​35-vjeçari nuk mund të kthehet në klub nëse nuk e ulë pagën.

“I vetmi që mund të bëjë diçka është klubi. Uroj që ai të kthehet dhe të mbarojë karrierën e tij në Barcelonë, por kjo nuk varet nga ne, ne nuk do të ndryshojmë rregullat në mënyrë që Messi të mund të rikthehet”, sqaroi Tebas.

Lexo po ashtu Laporta: Messi e di që dyert e Barcelonës janë të hapura për të

Duke qenë kështu, dhe duke pasur parasysh se “do të ishte e vështirë” – sipas vetë Tebas – që Messi të ulë ndjeshëm pagën e tij, Barcelona tashmë po mendon një mënyrë për t’i ofruar një alternativë ekonomike yllit argjentinas në mënyrë që ta bëjë atë të kthehet.

Sipas Mundo Deportivo, marrëveshja do të përfshinte ofrimin e një rroge jo shumë të lartë Messit, por në këmbim të propozimit për të fituar një përqindje të të ardhurave të krijuara nga niveli komercial.

Lexo po ashtu Çfarë shikojnë tifozët në televizor dhe çfarë jo – dalin pamjet nga instruksionet e Martinez për Messin te gjuajtja e lirë

Kështu, plani për të përmbushur ëndrrën për të parë Messin sërish në Barcelonë tashmë do të ishte duke u zhvilluar dhe, sipas Mundo Deportivo, klubi tani do të mbetej në prapavijë, pa bërë ende një lëvizje.

Messi tashmë është në dijeni të interesimit të ish-skuadrës së tij, të cilët presin një sinjal nga argjentinasi për të bërë lëvizjen e radhës. /Telegrafi/