Rusia vendos sisteme raketore rreth Moskës mes frikës së sulmeve me dron nga Ukraina

Vladimir Putin ka vendosur sisteme të mbrojtjes ajrore S-400 rreth Moskës nga frika e sulmeve hakmarrëse me dronë nga Ukraina.

Kjo vjen pasi Kievi nisi sulmet me dronë në dy baza ajrore ruse në Engels dhe Ryazan, thellë brenda kufijve ruse.

Vendosjet e sistemeve mbrojtëse besohet të jenë të reja dhe nxjerrin në pah frikën e presidentit rus për një sulm në kryeqytet.

Sistemet balistike janë vendosur në zonat e banuara, me një sistem S-400 që thuhet në fusha që i përkasin Akademisë Bujqësore Timiryazev në veri-perëndim të qytetit dhe një tjetër në ishullin Losiny në Sokolniki, në veri-lindje.

“Organet e ndryshme kanë publikuar informacione në lidhje me vendosjen e divizioneve S-400”, raportoi media e pavarur ruse SOTA në Telegram.

Javën e kaluar, artileria ruse goditi një bllok apartamentesh në Dnipro, duke vrarë të paktën 23 civilë dhe duke lënë 72 persona të tjerë, përfshirë shumë fëmijë, të plagosur rëndë.

Më shumë se 70 banesa u shkatërruan dhe mbi 230 u dëmtuan pjesërisht, duke lënë qindra të pastrehë në mes të dimrit.

Pavarësisht akteve të vazhdueshme të terrorit mbi popullsinë e tyre, qeveria ukrainase nuk ka dëshirë të kryejë mizori të ngjashme në Rusi.

Deri më sot, as Moska dhe as ndonjë qendër tjetër e popullsisë ruse nuk janë goditur. /Telegrafi/