Situata në veri, ish-zyrtari policor nga Mitrovica kërkon të rikthehet sërish në Policinë e Kosovës

Pjesëtarët e Policisë së Kosovës nga komuniteti serb, edhe zyrtarisht kanë dorëzuar dje dorëheqjet në stacionet policore në veri.

Si rezultat i kësaj situate të krijuar, shumë ish-policë që për arsye të ndryshme lanë këtë profesion, po lajmërohen vullnetarisht që të rikthehen në uniformën e shtetit.

Në mesin e tyre është edhe Isuf Brahimi, ish-zyrat policor nga Mitrovica.

Brahimi përmes një postimi në Facebook i ka bërë ftesë publike presidentes Vjosa Osmani, kryeministrit Albin Kurti, ministrit të Brendshëm, Xhelal Sveçla dhe drejtorit të PK-së, Fehmi Hoti që të mundësojnë kthimin e tij në Policinë e Kosovës.

“Për shkak të gjendjes së krijuar në institucionet  gjegjësisht në Policinë e Kosovës nga zyrtarët serb të cilët bojkotuan punën, kërkoj nga drejtuesit e institucioneve tona përgjegjëse që të na mundësohet rikthimi në Policinë e Kosovës që ta japim kontributin tonë aty ku shërbeva për shumë vite!”, ka shkruar Brahimi.

Kujtojmë se të shtunën më 5 nëntor, Lista Serbe ka njoftuar për largimin e serbëve nga institucionet e Kosovës.

Paralajmërimet e Listës Serbe për largim nga institucionet e Kosovës kanë ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.

Ndërkaq të dielën më 6 nëntor, kanë dhënë dorëheqje edhe kryetarët e katër komunave veriore. /Telegrafi/