Rasti “Pogba”: Situata duket më serioze se sa paraqitet në publik

Detaje të tjera të rastit “Pogba” janë shfaqur pas videove të së premtes së kaluar të Mathias Pogbas, në të cilat, ndër të tjera, ai akuzoi vëllain e tij Paul për përdorimin e magjistarëve kundër Kylian Mbappes.

Pjesa e fundit citon një hetim nga zyra e prokurorit të Parisit, duke pretenduar se lojtari i Juventusit pranon se ka përdorur një magjistar për t’u mbrojtur nga lëndimet e shpeshta që pësoi, por mohon ta ketë përdorur atë për të dëmtuar Mbappen.

“Kurrë nuk kam menduar të dëmtoj askënd”, u tha Paul Pogba hetuesve nga Zyra Qendrore e Francës për Luftën kundër Krimit të Organizuar (OCLCO), sipas Daily Mail.

Gazeta angleze raporton gjithashtu detaje të mëtejshme të hetimit në të cilin Pogba pretendon se persona të armatosur e sulmuan atë në periferi të Parisit më 19 mars dhe i kërkuan më shumë se 12 milionë euro.

“Isha i frikësuar. Dy djemtë më drejtuan armët”, u shpjegoi ai hetuesve. “Duke qenë se më mbanin ashtu me armë, u thashë se do të paguaj”.

“Më bërtitën: ‘Hesht, shiko poshtë’. Kur dy personat me kapuç u larguan, Roushdane më tha se duhet të paguaja sepse përndryshe të gjithë ishim në rrezik”.

Shqetësim në kombëtaren franceze

Kombëtarja franceze nuk është e panjohur për atë që po ndodh me Pogban , siç foli Raphael Varane në daljen e tij në media.

“A flisni mes jush për të gjitha këto?”, u pyet mbrojtësi. “Ne përpiqemi të qëndrojmë të fokusuar në fushë. Kjo është ajo që duhet të jetë e para për ne”.

“Tani, ne nuk jemi të pandjeshëm ndaj asaj që po ndodh rreth nesh, veçanërisht kur bëhet fjalë për njerëz që njohim. Ne jemi të shqetësuar, në një farë mënyre”.

“Në brendësi, gjërat po shkojnë shumë mirë, edhe nëse ka pak zhurmë rreth kombëtares franceze dhe futbollit francez”.

“Ne jemi të fokusuar në objektivin tonë dhe duam të jemi sa më profesionistë”, ka shtuar më tej ai. /Telegrafi/