Mehaj flet për shërbimin ushtarak: Kosova duhet të ketë rezervë vullnetare të ushtrisë

Ministri i Mbrojtjes, Armend Mehaj, të mërkurën gjatë raportimit në Komisionin për Çështje të Sigurisë së Mbrojtjes, tha se Kosova duhet ta ketë rezervë vullnetare të ushtrisë.

Para anëtarëve të komisionit, ai tha se janë duke punuar për formimin e një ligji të ri për rezervë ushtarake vullnetare.

Përmes këtij ligji, Mehaj tha se do të trajnohen rreth 20 mijë persona.

Këtë deklaratë ministri e bëri pasi u pyet nga anëtari i komisionit, Enver Dugolli, për shërbimin e detyrueshëm ushtarak, i cili ka qenë premtim elektoral.

“Së pari ju informoj se përmes punimeve ushtarake ndërlidhet çdo veprim me strategjinë. Përmes nevojës se ndryshimit të strategjisë së sigurisë aty është harmonizuar edhe nevoja shtetërore për shërbim ushtarak, një vlerësim që do të bëhet, por unë e kam parë të arsyeshme që si nevojë të jetë edhe Ligji për Rezervë Vullnetare. E shoh se në të ardhmen Kosova duhet të ketë një rezërve vullnetare prej 20 mijë persona që janë në shërbim përmes nevojave dhe t’i ketë stërvitjet e veçanta brenda vitit”, tha Mehaj.

Kryeministri i Kosovës, Albin Kurti, pati premtuar më 3 shkurt para deputetëve të Kuvendit, se gjatë qeverisjes së tij do ta jetësojë shërbimin ushtarak të detyruar.

Në atë fjalim, shefi i qeverisë pati thënë se do të nisin përgatitjet për shërbimin ushtarak të detyrueshëm në Kosovë.

“Ky shërbim do të jetë në kohëzgjatje 3 mujore, i cili do t’i ndihmojë Forcës së Sigurisë së Kosovës t’i përmbushë detyrat dhe rolin e saj shtesë në fushën e mbrojtjes”, pati deklaruar Kurti. /Telegrafi/