Dalja e parë pas zgjedhjeve, Basha: Pjesëmarrja e ulët tregon humbjen e besimit të qytetarëve

Kryetari i Partisë Demokratike, Lulzim Basha tha sot se zgjedhjet e pjesshme lokale të 6 marsit ishin një anomali që ka ardhur si pasojë e humbjes së besimit të shqiptarëve te vota.

Në një njoftim për shtyp të shpërndarë në rrjetet sociale, Basha u shpreh se pjesëmarrja e ulët e qytetarëve në zgjedhje tregon se ata nuk kanë asnjë garanci.

Ai ka shtuar se kjo situate ka nevojën për një reformë të thellë zgjedhore.

I pyetur nga gazetarët për rezultatin e dobët të PD-së në zgjedhje, Basha ka thënë se “PD është në një sulm të shumëfishtë për nevoja personale. Përgjigjja jonë është një reformë më e thellë”.

“Na takon ne të bëjmë një reflektim për reformim të brendshëm që ka nisur, nevojës për t’u ndarë nga e shkuara. Nuk është koha për t’i ikur përgjegjësive, por janë asgjësuar zgjedhjet”, u shpreh Basha.

Basha theksoi se “nuk ka shqiptar që nuk e kupton se 6 marsi është një anomali. Asgjë nuk ka ndryshuar me krimin zgjedhor të 25 prillit”.

Kujtojmë se kandidatët e PD-së nuk ka arritur të fitojnë në asnjë bashki ku tashmë ka përfunduar numërimi, ndërsa në të tjerat ka pothuajse asnjë mundësi të fitoj.

“Dua që procesi të përfundojë dhe i’u bëj thirrje numëruesve të vijojnë deri në fund. E kam bërë të qartë që 6 marsi ishte një anomali. Anomalia e parë ishin zgjedhjet moniste të 30 qershorit. Anomalia e dytë ishte që 4 kryebashkiakë dolën me rekorde kriminale. Në këto kushte, dhe kur nuk ka asnjë reflektim për 25 prillin, mendoj se shqiptarët e kanë kuptuar nevojën për një reformë të thellë zgjedhore”, ka shtuar Basha.

Basha ka folur edhe për disa parregullsi në zgjedhje.

“PD-së iu mohuan komisionerët. Aleanca e non-gratave kërcënoi komisionerët në Vorë. Ne kemi bërë 3 denoncime në Prokurorinë e Posaçme SPAK për mospërmbushje të detyrave. Shqipëria ka arritur në një pikë të papranueshme sa i përket zgjedhjeve, këtë e tregoi dhe elektorati me mospjesëmarrje”, ka theksuar Basha. /Telegrafi/