Sport Futboll Ndërkombëtare

Thellohet kriza dhe ndarjet te Man Utd, Maguire dhe Ronaldo në ‘luftë’ për shiritin e kapitenit – Rangnick mbanë anë

Para 3 vitesh

Cristiano Ronaldo dhe Harry Maguire besohet se janë në një ‘luftë për pushtet’ për shiritin e kapitenit te Manchester United pasi Ralf Rangnick është goditur nga një ‘krizë e re’ brenda skuadrës.

Ronaldo, 37 vjeç, i dha fund të martën thatësirës së tij prej gjashtë ndeshjesh pa gol në fitoren 2-0 të Unitedit ndaj Brighton në Old Trafford.

Megjithatë, pesë herë fituesi i Topit të Artë thuhet se është i pakënaqur me formën e Unitedit dhe është lidhur me një largim në verë nëse klubi dështon të arrijë një vend në katërshen e parë.

Portugezi, i cili ka kontratë deri në vitin 2023, ka shënuar 15 gola në 27 paraqitje për Unitedin që kur klubi e ri-nënshkroi atë nga Juventusi verën e kaluar.

Mediumi britanik Daily Mirror raporton se ish superylli i Juventusit dhe kapiteni aktual i Unitedit, Maguire janë ‘përfshirë në një luftë për pushtet’.

Sipas gazetës, Rangnick ka qenë i përfshirë në bisedime si me Ronaldon ashtu edhe me Maguire, të cilit i ka kërkuar të heq dorë nga shiriti i kapitenit për pjesën tjetër të sezonit.

Maguire, i cili u nënshkrua për 80 milionë funte në vitin 2019, është kritikuar ashpër për pozicionin e tij si kapiten i Unitedit dhe për formën e tij të dobët.

Megjithatë, mbrojtësi 28-vjeçar anglez nuk ka dëshirë t’i largohet shiriti i kapitenit për shkak të frikës së humbjes së pozicionit të tij si kapiten i përhershëm i klubit.

Raportohet se Maguire ndihet ‘gjithnjë e më i dëmtuar’ nga prania e Ronaldos në dhomën e zhveshjes së Unitedit dhe ‘ndikimi i tij i madh’ te lojtarët më të rinj.

Rangnick, i cili do të largohet nga posti i menaxherit të përkohshëm në fund të sezonit, ka ngarkuar Ronaldon që të mësojë lojtarët më të rinj në skuadër.

Por, lëvizja e lartpërmendur ka ‘çuar në fërkime të mëtejshme’ me Maguiren, i cili thuhet se ndjen se autoriteti i tij është ‘margjinalizuar’ dhe beson se disa nga lojtarët po ‘humbin respektin për të’.

Maguire u bë kapiten i Unitedit më pak se gjashtë muaj pas mbërritjes së tij në Old Trafford, me Ole Gunnar Solskjaer që i dorëzoi atij shiritin pas largimit të Ashley Young në janar të vitit 2020.

Mediumi The Mirror pretendon se ndërsa Ronaldo fillimisht ‘mbështeti’ ish-yllin e Leicester Cityt si kapiten i Unitedit, ‘mbështetja vokale’ e sulmuesit portugez ka filluar të zvogëlohet.

Është sugjeruar se ka një ‘besim në rritje’ në dhomën e zhveshjes së United se është vetëm çështje kohe para se Ronaldo të trashëgojë shiritin e kapitenit nga Maguire.

“Fillimisht, Ronaldo po u kërkonte lojtarëve të mbështesnin Harryn. Por, problemi është se menaxheri tani dëshiron që Ronaldo të jetë mentor i të gjithë këtyre lojtarëve të rinj”.

“Kjo e la Harryn në tokë të askujt, pasi ai është kapiten dhe duhet të thotë dhe të ndjekë çfarëdo që thotë Ronaldo, për të mbajtur gjithçka në rregull”, ka thënë një burim i Unitedit për gazetën. /Telegrafi/