Morata sonte ndaj Napolit duhet ta dëshmojë që nuk e ka mendjen te Barcelona, pasi Juventusi e ka bllokuar transferimin e tij

Ylli i Juventusit, Alvaro Morata, do të startojë kundër Napolit sonte pasi Massimiliano Allegri bllokoi kalimin e tij te Barcelona.

E ardhmja e spanjollit në Torino është në ajër pasi bardhezinjtë duket se nuk duan ta blejnë përgjithmonë, duke paguar 35 milionë euro në fund të sezonit.

Juventusi ka paguar tashmë 20 milionë euro për huazimin dy-vjeçar të lojtarit, por Morata ishte i hapur për t’u larguar nga Torino në afatin kalimtar të janarit për t’iu bashkuar Barcelonës.

29-vjeçari kishte folur me trajnerin e katalanasve Xavi dhe kishte rënë dakord për një kontratë 18-mujore në Nou Camp.

Megjithatë, Juventusi ka një buxhet të ngushtë transferimi dhe nuk mund të përballojë një zëvendësim të vlefshëm në janar, kështu që Allegri bllokoi daljen e Moratas.

“I thashë Alvaros se ai do të qëndrojë këtu, ai nuk do të largohet nga Juventusi, fundi i historisë”.

“Ai shënoi 21 gola sezonin e kaluar, ai shënoi shtatë këtë sezon. Ai është një lojtar i rëndësishëm dhe unë jam i lumtur me të”, kishte thënë trajneri në një konferencë për shtyp para ndeshjes të mërkurën.

Allegri gjithashtu hodhi poshtë një marrëveshje shkëmbimi që përfshin Memphis Depay pasi ai ka nevojë për një qendërsulmues klasik nëse Morata largohet.

Megjithatë, duket se spanjolli do të qëndrojë në Torino të paktën deri në fund të sezonit.

Të gjithë sytë do të jenë te sulmuesi spanjoll sonte pasi ai ka të ngjarë të startojë kundër Napolit në Allianz Stadium.

Sipas raportimeve në Itali, spanjolli tashmë po mendonte për kalimin e tij në Barcelonë. Gruaja e tij dyshohet se u kishte thënë miqve të saj se do të ishte zhvendosur në Spanjë me Moratan, por tashmë është bllokuar kjo gjë.

Sulmuesi është i vetëdijshëm se koha e tij në Torino mund të përfundojë në fund të sezonit. Gjithsesi, Allegri është përpjekur ta motivojë atë përpara pjesës së dytë të edicionit, i cila fillon sonte në një përballje kyçe kundër Napolit.

Vetëm pesë pikë ndajnë Juventusin dhe Napolin në tabelën e Serisë A, me Bianconerët që kërkojnë një vend në Ligën e Kampionëve. /Telegrafi/