Nuhiu: Na mungoi konkretizimi final

Drita dhe Llapi kanë luajtur pa gola në kryendeshjen e ditës së shtunë në Superligën e Kosovës.

Ka qenë një ndeshje shumë e luftuar nga të dyja skuadrat, por që në fund nuk solli fitues.

Dy ekipet u desh të kënaqen me nga një pikë pas barazimit pa gola 0-0.

Trajneri i Dritës, Ardian Nuhiu ka folur pas ndeshjes, duke thënë fillimisht se skuadra e tij dominoi në fundin e ndeshjes.

“Një ndeshje e luftuar nga të dyja skuadrat. Edhe Llapi ka pasur rastet e veta, por unë mendoj që 30 minutat e fundit e kemi dominuar ndeshjet, thjesht nuk kemi arritur të realizonim”.

“Kemi punuar gjatë javës pasi e kemi parë që edhe në ndeshjen e parë nuk kemi arritur të shënonim gol dhe u munduam që të punojmë në atë aspekt, por disa futbollistë që kanë mbetur jashtë shkak lëndimeve mendoj që do të shfrytëzojmë këtë pushimin për të ardhur deri tek më e mira e tyre”, deklaroi Nuhiu.

Tutje trajneri shkupjan i Dritës, deklaroi se skuadrës së tij i mungoi konkretizimi final për të shënuar gol.

“Ne kemi punuar gjatë javës dhe mendoj që kemi pasur dy tri raste por që nuk kemi arritur të realizonim dhe mendoj që mbrojtësit anësor kanë funksionuar për mrekulli por ai konkretizimi final na ka munguar”, tha Nuhiu. /Telegrafi/