Mediat serbe përpara vendimit për Ratko Mlladiqin: “E droguan që të përballonte dënimin”

Shpallja e vendimit përfundimtar kundër komandantit të Ushtrisë së Republika Srpska, Gjeneral Ratko Mlladiq, në Hagë të martën është tema e shumicës së mediave të Beogradit.

Dhe siç shkruajnë mediat boshnjake, përcjell Telegrafi, titujt shkojnë nga deklarimi i fakteve në lidhje me gjyqin deri te supozimet në lidhje me një vendim të mundshëm dhe favorizimin e Mlladiqit.

“Nëse ai do të gjykohej vërtet sipas ligjit, Mlladiq do të duhej të lirohej”, pretendon Informer në faqen e parë, ndërsa Alo, nën titullin “Mlladiq u drogua”, spekuloi se të akuzuarit të Hagës i “është dhënë drogë “në mënyrë që ai të përballonte dënimin”.

Ndërkohë mediumi Politika sjell një titull neutral: “Mlladiq pret vendimin e shkallës së dytë në Hagë sot”.

Ndryshe, Mladiq, me nofkën “kasapi i Bosnjës”, po përballet me ditën e fundit në gjykatë, ku do të dëgjojë gjykimin mbi apelin e tij kundër dënimit të tij për gjenocid, krime lufte, dhe krime kundër njerëzimit.

Sipas medieve të huaja, 26 vjet pas masakrës së Srebrenicës, Mladiq, 78-vjeçar, do të paraqitet të martën në gjykatën penale ndërkombëtare të mbështetur nga Kombet e Bashkuara për ish-Jugosllavinë në Hagë, për ato që pritet të bëhet më shumë se një orë aktvendimesh.

Pesë gjykatës do të paraqesin përfundimet e tyre mbi 10 vepra penale – që përfshijnë shfarosjen, transferimet me forcë, marrjen e pengjeve dhe sulmet e paligjshme ndaj civilëve – për të cilat atij iu caktua një dënim i përjetshëm në vitin 2017.

Gjykata gjithashtu do të vendosë mbi kërkesën e prokurorit të Kombeve të Bashkuara, Serge Brammertz, për një akuzë të mëtejshme për gjenocid që do të shtohet në listën e dënimeve.

Ky do të jetë vendimi përfundimtar i gjykatës, pa mundësi ankese të mëtejshme. /Telegrafi/