Haradinaj tregon pse nuk u përfshi në debatin për ministren Gërvalla, kritikon edhe PDK-në

Kandidati i Aleancës për Ardhmërinë e Kosovës për kryetar të Prishtinës, Daut Haradinaj ka treguar se pse nuk është përfshirë në debatin e fundit që është bërë rreth ministres së Punëve të Jashtme, Donika Gërvalla, për qëndrimin e saj për Gjykatën Speciale.

Haradinaj ka deklaruar se nuk është përfshirë në debat, pasi që ministrja është pasardhëse e një heroit, transmeton Telegrafi.

“Donika është bashkëvendëse e jona, është bija e heroit. Ne i dimë vuajtjet që i ka pasur, ne asnjëherë nuk do të biem pre e situatave politike për me kritiku një pasardhëse të heroit tanë”, pohoi ai në Debat Plus të RTV Dukagjinit.

Ndërkaq, sa i përket akuzave që PDK i ka bërë në drejtim të ministres Gërvalla, Haradinaj tha se PDK nuk duhet të bëjë propaganda.

“PDK i ka politikat e veta, e që të zotit e shtëpisë i ka në rrethanë më të vështira. Është lehtë më dal në shesh e të bëjnë propaganda.
Ata i kanë juristët e tyre, por që në këto rrethana asnjëra palë nuk do të dalë fituese”, shtoi.

Megjithatë, Haradinaj tha se ministrja Gërvalla tashmë është kryediplomate dhe ka për detyrë që të përkujdeset për qytetarët e Kosovës. /Telegrafi/