Flasin qytetarët për aktakuzën e Speciales: Asnjë ushtar i UÇK-së nuk ka kryer krime ndaj civilëve serbë

Pas ngritjes së aktakuzës kundër presidentit të Republikës së Kosovës, Hashim Thaçi dhe kryetarit të Partisë Demokratike të Kosovës, Kadri Veseli, nga zyra e Prokurorit të Specializuar, disa qytetarë të Republikës së Kosovës kanë thënë se Gjykata Speciale është e padrejtë dhe se lufta e Ushtrisë Çlirimtare të Kosovës (UÇK) është e pastër.

Qytetari Skender Musa, në një prononcim për Telegrafin ka thënë se asnjë pjesëtar i UÇK-së, i cili ka pas uniformë nuk ka kryer krime ndaj civilëve serbë.

“Kjo gjykatë nëse punon drejt do ta pastrojë luftën e pastër të UÇK-së, sepse është tejet e sigurt që asnjë ushtar i UÇK-së që ka pas uniformë nuk ka kryer krime ndaj civilëve serbë. Ka qenë e vetmja ushtri guerile që e ka respektuar me përpikëri Konventën Ndërkombëtare të Luftës”, ka thënë Musa.

Edhe Qazim Fazlia, thotë se kjo gjykatë është e padrejtë, siç tha ai kur dihet për krimet serbe në Kosovë.

“Kjo gjykatë është e padrejtë, për arsye se gjykon vetëm pjesëtarët e UÇK-së, kur dihet se Serbia çfarë krimesh ka bërë në Kosovë. Prandaj për mu është lajm i keq”, u shpreh Fazlia.

Në të njëjtin mendim është edhe qytetari Ermal Emini, i cili theksoi se aktakuzat e Prokurorisë Speciale janë shumë të rënda.

“Aktakuzat janë shumë të rënda, ishalla nuk janë të vërteta dhe lufta del e pastër”, tha ndër të tjera Emini.

Ndryshe, të mërkurën Prokuroria Speciale ka ngritur aktakuzë kundër presidentit, Hashim Thaçi dhe kryetarit të Partisë Demokratike të Kosovës, Kadri Veseli. Pas kësaj, presidenti Thaçi dhe kryeministri Hoti kanë anuluar vizitën në Washington, ku pritej të rifillonte dialogu me Serbinë.

Zyra e Prokurorit të Specializuar, ka njoftuar se më 24 prill u ka dërguar Dhomave të Specializuara të Kosovës, me seli në Hagë, një aktakuzë me dhjetë pika për shqyrtim, në të cilën presidenti Thaçi, kryetari i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura. /Telegrafi/