Zemaj: Rekomandohen, por nuk obligohen bashkatdhetarët që vijnë në Kosovë të bëjnë testin për COVID-19

Ministri i Shëndetësisë, Armend Zemaj, ka thënë se qytetarët të cilët hyjnë në Kosovë, përmes aeroportit ndërkombëtar të Prishtinës “Adem Jashari”, nuk janë të obliguar të kryejnë testin nëse janë apo jo të infektuar me COVID-19.

Këtë deklaratë ministri Zemaj e dha gjatë një vizite në Gjilan.

Ministri Zemaj theksoi se Ministria e Shëndetësisë, i ka rekomanduar qytetarët që jetojnë jashtë vendit për ta bërë testin, por jo t’i obligojë ata.

“E kemi lejuar aeroportin, nuk është i hapur tërësisht, por vetëm në vija të rregullta. Ju kemi rekomanduar qytetarëve që jetojnë jashtë vendit që ta bëjnë testin por nuk është obligative për të hyrë në Republikën e Kosovës vetëm me dëshmi të testit”, ka thënë Zemaj.

Ai tha se si ministër i ri ka gjetur një numër të madh të vendimeve që kanë qenë në kundërshtim me njëra-tjetrën.

“Si ministër i ri kam gjetur një numër të madh të vendimeve që kanë qenë në kundërshtim të madh me njëra-tjetrën, pavarësisht dikastereve profesionale…Nuk ka qenë asnjëherë dhe nuk është në detyrën e Ministritë të Shëndetësisë, se si bëhet mbarëvajtja e tubimeve, ahengjeve, dasmave etj. Ato janë vendime të cilat janë marr dhe ne i kemi adresuar bashkë me rekomandimet e IKSHPK-së, për të mos krijuar paqartësi qoftë në mbikëqyrjen e tyre sipas manualit i cili është aprovuar nga Ministria e Shëndetësisë dhe është bërë obligim qeveritarë. Është në kompetencë të Ministrisë së Transportit dhe Ministrisë së Tregtisë që rekomandimet të cilat janë dhënë nga IKSHPK-ja dhe MSH-ja, ata t’i përgatisin me udhëzues që mund të kalojmë në fazën  tjetër të organizimit dhe të mbikëqyrjes edhe të këtyre aktiviteteve”, tha ai. /Telegrafi/