Nagavci flet për manifestimin e sotëm: Protestat do të jenë të shumta

Nënkryetarja e Kuvendit, njëherit anëtare e Kryesisë së LVV-së, Arbërie Nagavci në një intervistë për “Përballje ditore” në Telegrafi.com me kryeredaktorin Muhamet Hajrullahu ka folur për manifestimin e sotëm të Lëvizjes Vetëvendosje në sheshin “Skënderbeu” në Prishtinë.

Nagavci ka thënë se manifestimi nuk i përjashton protestat, duke thënë se shkaku i veprimeve të Qeverisë Hoti protestat do të jenë të shumta.

“Është privilegj që së bashku në ditën e çlirimit të Kosovës ne shënojmë ditëlindjen e LVV-së, dhe sot do të kemi një manifestim publik ku festojmë këto dy ditë dhe tregojmë gatishmërinë tonë për një Kosovë më të mirë. Në situatën në të cilën jemi dhe me këtë qeveri ilegale po duket se pa shmangshëm shpejt do të kemi edhe protesta, manifestimi nuk i përjashton protestat. Me zhvillimet që po shihen dhe veprimet e para të kësaj qeverie ilegale duke filluar prej mënyrës sesi erdhën në pushtet dhe nxitimi për heqjen e masës së reciprocitetit, duket se arsyet për protesta do të jenë të shumta e të shpejta”, tha Nagavci.

Ajo shtoi se shpresojnë që kjo jo qeveri të vetëdijesohet për detyrën dhe obligimin që ka në raport me shtetësinë e Kosovës.

Nagavci theksoi se kërkesa e tyre legjitime mbetet për zgjedhje të reja. /Telegrafi/