Marca: Harta për çdo kampionat në Evropë dhe situata aktuale – ligat e mëdha me datë, Kosova ende e pavendosur

Ligat evropiane gradualisht po mendojnë për një rikthim në aksion, ku shumë prej tyre kanë një datë zyrtare.

Serie A i ka propozuar një plan qeverisë italiane, ku mendohet që të rikthehet me ndeshje të luajtur nga 13 qershori.

Klubet italiane duan të mbyllin sezonin, jo vetëm në kampionat, por edhe ndeshjet e Kupës për t’i lënë vend Ligës së Kampionëve.

Gjermania udhëheq rrugën, shumë shtet me datë zyrtare  

Bundesliga është vendosur të kthehet të shtunën, me pesë ndeshje që do të zhvillohen nga ora 15:30.

Natyrisht që klubet do të kenë një protokoll strikt, shkruan Marca.

Tutje gazeta shkruan se kampionatet si ai në Shqipëri, Austri, Bullgari, Kroaci, Danimarkë, Finlandë, Hungari, Mali i Zi, Norvegji, Poloni, Portugali, Republika Çeke, Serbia dhe Turqia tashmë kanë një datë zyrtare për tu rikthyer.

Ndërkohë, futbolli në Francë, Holandë dhe Luksemburg është anuluar, ndërsa në Belgjikë pritet vetëm drita jeshile e kuvendit.

Liga e Bjellorusisë nuk është ndalur kurrë, ndërsa futbolli u rikthye përsëri në Ishujt Faroe më 9 maj.

Kampionatet e fora që kanë caktuar data fillestare janë Liga Premier (12 qershor) dhe La Liga (12 ose 19 qershor), Liga Premier e Ukrainës që pret kthimi më 30 maj.

Sa i pëket Kosovës, vendimi fillestar është që Superliga të kthehet në qershor, por ende pritet drita jeshile për të filluar me stërvitje.

Kampionati ynë është një nga më interesantit sa i përket luftës për titull dhe mbijetesë, prandaj rikthimi në fushë shihet si i nevojshëm.

Kosova ende nuk ka një datë të saktë dhe këtë e ka shkruar edhe Marca. /Telegrafi/