Reduktohen shujtat ditore për të karantinuarit në Qendrën Studentore

Numri i shujtave ditore për të karantinuarit në Qendrën e Studentëve është reduktuar në dy nga tri sa ishin deri më tani. Kjo ka shkaktuar pakënaqësi tek një pjesë e të karantinuarve.

Drejtori i mensës së studentëve Fahri Osmani ka shpjeguar për RTV Dukagjinin arsyet pse është marrë një vendim i tillë për të reduktuar shujtat ushqimore.

“Gjatë shpërndarjes së shujtave ushqimore ka pasur kontakte të vullnetarëve të stafit me të karantinuarit. Por njëkohësisht kemi ardhur në përfundim edhe në bashkëpunim me vet të karantinuarit se dy shujta në ditë janë të mjaftueshme”, tha ai, përcjell Telegrafi.

Osmani thotë se për cilësinë e ushqimit nuk ka pasur asnjë vërejtje nga të karantinuarit, duke shtuar se personave me nevoja të veçanta u dërgohet ushqim i përshtatshëm.

“Ne e kemi marrë parasysh edhe faktin se kemi qytetarë që vuajnë nga sëmundje të ndryshme kryesisht prej tensionit të lartë”.

Drejtori i mensës së studentëve ka thënë se të karantinuarit kanë edhe frigorifer për ruajtjen e ushqimeve, duke treguar edhe një meny të zakonshme që u shërbehet personave që qëndrojnë aty.

“Sot për kohën e drekës kemi përgatitur patate me mish gjedhi, suxhuk, djathë, ujë, qumësht e ëmbëlsirë. Pra është një meny mjaft e pasur. Pasdite vazhdimisht i shërbejmë edhe me pemë. Pra është një meny që ua plotëson nevojat kalorike”.

Aktualisht në Qendrën Studentore janë të karantinuar 330 qytetarë, ndërsa nga 30 marsi ën konvikte kanë qëndruar në karantinë për dy javë 894 qytetarë./Telegrafi/