Osmani: Rënia e familjes Jashari, na tregoi se sa e shtrenjtë ishte çmimi i lirisë tonë

Kryetarja e Kuvendit të Kosovës, Vjosa Osmani në seancën e veçantë të Kuvendit me rastin e Epopesë së UÇK-së, ka thënë se sot e përkujtojmë veprën heroike të komandantit Adem Jashari, dhe sakrificën sublime të familjes Jashari.

Osmani shtoi se Ademi së bashku me anëtarë të tjerë të familjes ishin mësuar të jetonin nën kërcënim të vazhdueshëm, dhe kjo i kishte motivuar edhe më shumë për rezistencë.

“Kjo e kishte motivuar edhe më shumë për rezistencë, prandaj komandantit dhe familjes Jashari nuk iu shkonte mendja të dorëzoheshin. Rënia e tyre është simbol i sakrificës njerëzore dhe qëndresës së popullit shqiptar”, tha Osmani.

Kryeparlamentarja shtoi se rrethimi i tyre nga regjimi serb dhe pastaj rënia e tyre i treguan botës demokratike pamjet e errëta të regjimit totalitar serb.

“Rënia e familjes Jashari ishte thirrje globale për mbrojtjen e vlerave normale. Ngjarjet e 5,6, dhe 7 marsit 1998 në Prekaz i dhanë vulë solidaritetit ndërmjet njerëzve. Në atë fillim mars secili shqiptar ishte Ademi, secili shqiptar ishte i gatshme të sakrifikonte gjithçka për vendin e tij”, shtoi Osmani.

Lexo po ashtu Kurti: Familja Jashari u sakrifikuan sepse e deshtën lirinë dhe tokën më shumë se jetën

Osmani theksoi se beteja e Jasharajve u shndërrua në inspirim për mijëra të rinj e të reja që ata të jenë të gatshëm të sakrifikojnë gjithçka për idealin e tyre.

Ajo përmendi me emra të gjithë anëtarët e familjes Jashari që ranë heroikisht gjatë luftës për Kosovën e lirë.

“Unë nuk mund ti përmbledh në numër ata që ranë në këtë betejë, sepse ata nuk janë thjesht një numër, secili është një histori në vete”, u shpreh Osmani.

Osmani shtoi se beteja e Jasharajëve na tregoi se sa e kushtueshme është jeta dhe sa e shtrenjtë ishte çmimi i lirisë tonë. /Telegrafi/