Si është mbrojtur Kim Jong-Un nga coronavirusi, edhe pse janë fqinjët e parë të Kinës – në Korenë e Veriut nuk ka të infektuar

Kanë kaluar pothuajse dy muaj nga shpërthimi i virusit vdekjeprurës coronavirus që u lajmërua në qytetin kinez Wuhan, ku prej atëherë çdo qeveri dhe territor në lindje të Azisë ka konfirmuar raste të infektuarve me këtë virus, por një gjë e tillë nuk ka ndodhur në Korenë e Veriut.

Një nga vendet më të varfra në botë, sipas të dhënave zyrtare ka arritur ta shmang virusin, pavarësisht faktit që kufizohet me Kinën, ku nga coronavirusi humbën jetën më shumë se 600 persona, kurse mbi 31 mijë tjerë janë infektuar, shkruan CNN, transmeton Telegrafi.

Gjithashtu, çdo vend në një rreze prej 2.500 kilometra nga Koreja e Veriut, përveç Mongolisë, kanë konfirmuar raste e personave të infektuar me coronavirus.

Siç raporton CNN, ende nuk dihet se si Pyonyang ka arritur ta shmang virusin, duke shtuar se Koreja e Veriut ka pasur fat, apo ndoshta nuk është e sinqertë apo përdor përparësinë që është një vend i izoluar ku informacionet janë të pakta.

Ky shtet zyrtarisht nuk ka raportuar për ndonjë person të infektuar me coronavirus, por profesori në Universitetin e Koresë, Nam Sung Vuk, i cili më parë ka qenë shef i agjencisë së zbulimit të Koresë së Jugut, ka deklaruar për CNN, se ekzistojnë gjasa të mëdha që dikush në mesin e 25 milionë banorëve sa jetojnë në Korenë e Veriut, të jetë infektuar.

“E dimë se ka të infektuar në rajonet kineze që kufizohen me Korenë e Veriut. Rreth 99 për qind e tregtisë së Koresë së Veriut zhvillohet me Kinën dhe e dimë se shumë njerëz, kamionë dhe trena kanë kaluar kufirin mes këtyre dy vendeve, para se Koreja e Veriut të ndërmerrte masa për të parandaluar zgjerimin”, ka shtuar Nam.

Koreja e Veriut ka mbyllur kufijtë për turistët, shumica prej të cilëve janë kinezë, si dhe kanë hapur qendër kundër zgjerimit të epidemisë, kurse të gjithë personat që janë futur në këtë vend para 13 janarit, janë nën mbikëqyrjen e mjekëve.

Agjencia shtetërore KCNA gjithashtu ka raportuar se punonjësit shëndetësor kanë instaluar sisteme për diagnostifikim në gjithë vendin, me qëllim që të munden brenda një kohe të shkurtër të zbulojnë prezencën e virusit vdekjeprurës.

Lexo po ashtu Tajlandezja që e mundi coronavirusin, 9 ditë qëndroi në izolim total – nuk e lejonin t’i takojë familjarët

Megjithatë, disa ekspertë me të cilët ka biseduar CNN janë skeptik kur është në pyetje aftësia e Pyongyangutr sa i përket testimit të njerëzve dhe prezencës së virusit.

CNN shkruan që Koreja e Veriut është një nga vendet më të izoluara në botë, dhe se ky vend kurrë nuk e ka pranuar se sa njerëz kishin vdekur gjatë viteve të 90-ta nga uria për shkak të thatësisë dhe ndaljes së ndihmave nga e gjithë bota. /Telegrafi/