Haziri: Nuk presim ndryshim rezultati nga votat e diasporës, bëjmë qeveri me 2/3 e votave

Nënkryetari i LDK-së, Lutfi Haziri, që ishte edhe shef i shtabit zgjedhor të kësaj partie në zgjedhjet e 6 tetorit, ka pranuar se kjo parti nuk ka arritur të del si e parë në zgjedhje.

Haziri në “Debat Plus” me Ermal Pandurin në RTV Dukagjini ka thënë se Albin Kurti arriti të sjellë votën e partisë së tij në popullaritetin që ai vet kishte, përcjell Telegrafi.

Ai ka thënë se LDK ka kryesuar deri në mesditën e së dielës, por sipas tij trendet ndryshuan më pas, duke e nxjerr Vetëvendosjen të parën.

Nënkryetari i LDK-së thotë se pavarësisht numrit të madh të votave nga diaspora dhe ato me kusht nuk presin ndryshim rrënjësor të rezultateve aktuale, e që do të mund të përmbysnin kryesimin e Vetëvendosjes.

Shef i shtabit zgjedhor të LDK-së ka thënë se fituesi i madh i këtyre zgjedhjeve është Vetëvendosje ndërsa fituesi i dytë është LDK-ja.

“Trendi gjatë këtyre 48 orëve të fundit është i qartë. Mund të ketë ndryshim të votave në promila por jo sa të ndryshojë rezultatin e zgjedhjeve”.

Haziri ka thënë se nuk do të ketë vështirësi në formimin e qeverisë pasi dy partitë kryesore bashkë me minoritetet do të përbëjnë shumicën kushtetuese prej 2/3./Telegrafi/