IKSHP: Të gjitha grupmoshat janë të rrezikuara nga ethet e minjve, zbulimi i vonshëm mund t’i bllokojë veshkat

Instituti Kombëtar i Shëndetësisë Publike të Kosovës (IKSHP), ka tërhequr vëmendjen e qytetarëve për të pasur kujdes ndaj etheve të minjve.

Përmes njoftimit për media kanë njoftuar se këtë vit, një pacient është në gjendje të rëndë dhe se po merr trajtimin në Qendrën Klinike Universitare të Kosovës (QKUK).

Në sqarimin e IKSHP për telegrafin kanë sqaruar se ethet e minjve janë sëmundje virale, të cilat barten sipas tyre, përmes minjve dhe mund të jenë të rrezikshme nëse qytetarët nuk i përmbahen higjienës, e masave parandaluese.

“Të gjitha grupmoshat janë të rrezikuara nga ethet e minjve”, kanë theksuar nga IKSHP.

Duke folur për masat parandaluese nga ethet e minjve, nga IKSHP kanë thënë se ato masa janë:

1. Pengimi i futjes së brejtësve në shtëpi dhe stane.
2. Ruajtja e ushqimit nga ekskretet e brejtësve.
3. Përpunimi termik i artikujve ushqimor të dyshimtë
4. Frytet e pyllit mos të konsumohen pa u pastruar
5. Djathit të freskët t’i shtohet kripë dhe mos të konsumohet si i freskët nëse dyshohet se është   kontaminuar
6. Gjatë punës në fushë të punohet me maska nëse vërehet shtim të brejtësve
7. Larja e duarve me ujë dhe sapun te kosarët dhe punëtorët tjerë të fushës para ngrënies
8. Mos hidhni mbeturina kudo
9. Të bëhet klorimi i ujit të pijes
10. Zhdukja e vatrave natyrore të brejtësve
11. Dezinfektimi i sipërfaqeve të kontaminuara nga ekskretet e brejtësve.

Fatmirësisht trajtimi i sëmundjes sipas IKSHP, bëhet me sukses të plotë në Klinikën Infektive në Qendrën Klinike Universitare të Kosovës (QKUK), në qoftë se paraqiten me kohë.

“Po qe se të sëmurët kërkojnë ndihmë me vonesë, atëherë paraqiten komplikime, e që mund të rezultojë në bllokimin e veshkave”, kanë njoftuar për Telegrafin nga IKSHP./Telegrafi/