LSDM: Të dhënat reale vërtetojnë se sa më afër anëtarësimit në NATO aq më shumë janë përfitimet ekonomike

Nëpërmjet një njoftimi nga partia maqedonase në pushtet thuhet se se “përparimi në integrime, procesi i ratifikimit të protokollit në NATO dhe politikat e suksesshme seriozisht lëvizën ekonominë”.

“Parametra të shumtë ekonomik, tregojnë se vetëm për një vit nga intensifikimi i procesit integrues, përfitimet ekonomike janë reale të dukshme”, thonë nga LSDM, njofton Telegrafi Maqedoni.

Sipas tyre, për vetëm një vit paga mesatare është rritur për 7.5%, përkatësisht nga 22.850 që ka qenë gjatë dhjetorit të 2017-tës, në 25.784 denarë në dhjetor të vitit 2018.

“Integrimi e ktheu besimin në ekonomi, viti 2018 do të mbahet mend si vit me investime më të shumta të huaja prej 624.5 milion euro apo 276% mbi mesataren”, thonë nga LSDM duke përmendur uljen e papunësisë në 19.4% në tremujorin e fundit.

Në fund të njoftimit ata shtojnë se anëtarësimi në NATO dhe përparimi në integrimet me BE-në do ta përshpejtojnë rritjen ekonomike ndërsa ekonomia, siç thonë nga kjo parti, do të bëhet më konkurruese dhe më atraktive për investitorët./Telegrafi/