PD: Dënojmë dhunën e policisë

Partia Demokratike ka reaguar zyrtarisht pas protestës së ditës së djeshme në Tiranë.

PD-ja dënon ushtrimin e dhunës, sipas saj, nga ana e policisë, duke paralajmëruar se 16 shkurti është fillimi i betejës për të çliruar vendin nga kryeministri Edi Rama.

Lexo po ashtu Basha: Skenar kriminal i policisë nën urdhrat e Edi Ramës

“Partia Demokratike dënon me forcë ushtrimin e dhunës policore ndaj kundërshtarëve politikë. Rrahja dhe keqtrajtimi i protestuesve prej policisë politike nuk ka për ta shpëtuar dot kryehajdutin Edi Rama dhe pushtetin e tij të blerë me paratë e krimit të organizuar. Secili prej anëtarëve të Policisë Politike që, në shkelje të ligjit, po shoqëron, dhunon dhe po ushtron presion ndaj protestuesve, do të mbajë përgjegjësi personale. Ne nuk do ta harrojmë këtë! PD falënderon çdo qytetar pjesëmarrës në protestë, që sakrifikoi sot diçka nga vetja për t’i shërbyer misionit madhor të çlirimit të qeverisjes nga një grusht hajdutësh, oligarkësh dhe kriminelësh, që ka marrë peng vendin. 16 Shkurti është fillimi i betejës për çlirimin e vendit nga Kryeministri hajdut. Fundi i tij është i pakthyeshëm! Shqiptarët treguan sot se, të bashkuar, mund ta mposhtin të keqen! E enjtja është shumë afër”, thuhet në deklaratën e PD-së. /Telegrafi/