Ministria e Infrastrukturës ndanë 2 milionë euro për Rrugën ‘A’ në Prishtinë

Ministri i Infrastrukturës, Pal Lekaj së bashkë me kryetarin e Komunës së Prishtinës, Shpend Ahmeti, kanë nënshkruar memorandum bashkëpunimi për projektet e ndryshme infrastrukturore.

Ministri Lekaj ka njoftuar se për Rrugën “A” janë ndarë dy milionë euro.

“Ne sapo u dakorduam ne kryetarin Ahmeti që t’i ndajmë dy milionë euro për këtë rrugë, që të fillojnë procedurat dhe projekti të zhvillohet”, tha Lekaj.

Kryetari Ahmeti ka njoftuar se shumë shpejt do të jetë në qarkullim linja e autobusëve nga Prishtina në drejtim të Aeroportit “Adem Jashari”.

“Që një kohë tashmë e kemi nisur një diskutim për linjën e autobusit prej qytetit të Prishtinë deri në Aeroport. Jam i lumtur që e nënshkruam këtë memorandum të mirëkuptimit, me qenë se kjo është linjë është pronë e Ministrisë dhe për këtë kemi arritur marrëveshje që Komuna e Prishtinës, përmes Trafikut Urban ta ofrojmë këtë shërbim, të cilët pas këtij nënshkrimi do ta formojmë një komision të përbashkët që do ta vendos orarin edhe çmimin, mirëpo ideja është që ky çmim të jetë më i lirë. Është pak e habitshme që deri më tani nuk e kemi pasur një linjë të tillë, që te kemi Aeroportin dhe mos të kenë transport publik”, tha Ahmeti.

Ndërsa, ministri Lekaj, tha se Ministria e Infrastrukturës dhe Komuna e Prishtinës do të zhvillojnë dhe projekte të tjera infrastrukturore.

“Prej moment të marrjes së detyrës si ministër unë kam gjetur një bashkëpunim te Komuna e Prishtinës dhe ne kemi bërë projekte që shkojnë në favor të qytetarëve. Falënderoj kryetarin Ahmeti që ta nënshkruan këtë marrëveshje dhe që të kemi linjë të rregullt për Aeroportin e Prishtinës. Deri më sot kemi shpallë interes publik, por kompanitë nuk kanë qenë të interesuara dhe në pajtueshmëri me Komunën, sot po përfundojmë këtë kërkesë të qytetarëve dhe të udhëtarëve që udhëtojnë në drejt Aeroportit. Ne me kryetarin Ahmeti kemi edhe projekte të tjera të infrastrukturës dhe asnjë projekt nuk do të zhvillohet pa u pyetur i zoti i shtëpisë, sepse aty ku kalon infrastruktura të nuk kemi marrëveshje, atëherë do të dështojnë projektet”, tha Lekaj. /Telegrafi/